ოზურგეთში მდებარე რომელი რესტორნები შეძლებენ დღეიდან მომხმარებლის მიღებას

დღეიდან რესტორნებში ღია სივრცეები იხსნება. მთავრობის გადაწყვეტილებით, რესტორნების ღია სივრცეებს მუშაობის განახლება 15 თებერვლიდან მთელი საქართველოს მასშტაბით შეეძლებათ.  თუმცა, იმოქმედებს ახალი რეგულაციები. კვების ობიექტებისთვის მუშაობა შაბათ-კვირას კვლავ შეზღუდული რჩება. 

აღსანიშნავია, რომ ღია სივრცე ყველა რესტორანსა და კაფეს არ გააჩნია. იგივე ვითარებაა ოზურგეთშიც. აქაც, ისევე, როგორც მთელ საქართველოში მუშაობას მხოლოდ რესტორნების ნაწილი განაახლებს. თუმცა საყურადღებოა საკითხის მეორე მხარეც. რესტორნების მფობელების ნაწილი ამბობს, რომ ღია სივრცე აქვთ, თუმცა განაახლებენ თუ არა მუშაობას, ამასთან დაკავშირებით გადაწყვეტილება ჯერჯერობით არ მიუღიათ.

”რესტორნის ღია ნაწილი გვაქვს.  რეგულაციებს ზედმიწევნით ვიცნობთ, მაგ თვალსაზრისით გასახსნელად სრულიად მზად ვართ, თუმცა მეორე საკითხია მოთხოვნა. რამდენად იქნება ინტერესი მომხმარებლის მხრიდან, ასევე, გასათვალსწინებელია ამინდის ფაქტორიც. შესაბამისად, ჯერჯერობით გადაწყვეტილება არ მიგვიღია” – გვითხრეს რესტორან ”თამარიონის” ადმინისტრაციაში.

”ჯერჯერობით საკმაოდ ძლიერი სიცივეებია და შესაბამისად, არ ვიცით, რამდენად აქტიურად იმუშავებს ჩვენი რესტორნის ტერასა. თან ამ ეტაპზე რემონტიც გვაქვს, თუმცა ვფიქრობთ, რომ პროცესს დავაჩქარებთ და 1 მარტისთვის ”არგოს” ტერასა სტუმრების მისაღებად მზად იქნება” – განაცხადა რესტორან ”არგოს” მფლობელმა თემურ კილაძემ.

გამომდინარე იქიდან, რომ ღია სივრცე არა აქვს, მუშაობას ამ ეტაპზე  ვერ განაახლებს რესტორანი ”ქალაქური”. გაურკვეველია საბანკეტო დარბაზების ბედიც, ამ ტიპის კვების ობიექტები ოზურგეთში საკმაოდ ბევრია.

შეზღუდვის შემსუბუქების ეტაპს სრულყოფილად გამოიყენებს ტერასა ”ოზურგეთი პლაზა”, ”ფიროსმანი” და ””პაბი ტერასა”. ვინაიდან ღია სივრცე სამივე მათგანს გააჩნია, აღნიშნულ ლოკაციებზე სტუმრებს სერვისის სრულყოფილად მიღების საშუალება ექნებათ.

შეგახსენებთ, რომ საქართველოში რესტორნები და კაფეები სტუმრებისთვის დაკეტილი იყო  2020 წლის ნოემბრის ბოლოდან. კვების ობიექტები გატანა-მიტანის წესით მუშაობენ.