ოზურგეთში კათოლიკეებისთვის ღვთისმშობლის პორტუგალიური ქანდაკება ჩამოაბრძანეს

ოზურგეთის კათოლიკურ ტაძარში პორტუგალიიდან წმინდა ღვთისმშობლის ქანდაკება ჩამოაბრძანეს.
კათოლიკე მორწმუნეებმა სიწმინდე ტაძრამდე საზეიმო მსვლელობით მიაბრძანეს.
ამაღამ მორწმუნეები ღვთისმშობლის წმინდა ქანდაკებისადმი ღამისთევის ლოცვას გამართავენ. ხვალ კი წმინდა წირვისა და ზიარების შემდეგ ქანდაკებას სამცხე-ჯავახეთში წააბრძანებენ.
პადრე გაბრიელ ბრაგანტინი, რომელიც წარმოშობით იტალიიდან არის, ოზურგეთის კათოლიკურ ეკლესიას უკვე 15 წელია ხელმძღვანელობს. მისი თქმით, ღვთისმშობლის ქანდაკება პორტუგალიაში, 1917 წელს მომხდარ სასწაულს უკავშირდება, როცა წმინდა მარიამი სამ ყრმა მწყემსს გამოეცხადა.
“ღვთისმშობლის ქანდაკების ჩამობრძანება ჩვენი მრევლისთვის მნიშვნელოვანი მოვლენაა. ეს არის რწმენის, გაერთიანების და იმედის სიმბოლო ყველა კათოლიკე მორწმუნესთვის”- აღნიშნა პადრე გაბრიელმა “გურიაTV”-თან.
ღვთისმშობლის ქანდაკება ოზურგეთიდან სამცხე-ჯავახეთში წაბრძანდება. იქიდან უკვე ქანდაკებასთან ლოცვის საშუალება სომხეთსა და აზერბაიჯანში ექნებათ. ამის შემდეგ ქანდაკება ერთი დღით თბილისში იქნება დაბრძანებული და პორტუგალიას მხოლოდ ამის შემდეგ დაუბრუნდება.