ოზურგეთის N 3 ბაგა – ბაღში ქუნთუშის შემთხვევები დაფიქსირდა. მაღალი სიცხე, ღებინება, მწვავე ანგინა და გამონაყარი ერთ–ერთ აღსაზრდელს გასული კვირის ბოლოს გამოუვლინდა. როგორც სააღმზრდელო ცენტრის ხელმძღვანელმა, მაკა ჭყონიამ ”გურიაTV”-ის უთხრა, აღნიშნულთან დაკავშირებით მშობელი ბაღის მენეჯერს დაუკავშირდა, ამის შემდეგ სააღმზრდელო ცენტრმა კი საქმის კურსში ოზურგეთის საზოგადოებრივი ჯანდაცვის ცენტრი ჩააყენა. დღეს დილით ბაღის შენობაში უკვე ჩატარდა შესაბამისი ეპიდემიოლოგიური სამუშაოები და მონიტორინგი. ეპიდემიოლოგის, ელზა სიმონიშვილის თქმით, ამ დროისთვის ქუნთრუშა ორ ბავშვს დაუდასტურდა, ორს კი სიმპტომები აქვს. პატარების ჯანმრთელობისა და უსაფრთხოების დაცვის მიზნით, საზოგადოებრივი ჯანდაცვის ცენტრის მიერ გაიცა რეკომენდაცია, რომ ხსენებულ ჯგუფში სააღმზრდელო პროცესი შეჩერებულიყო. დანარჩენ ჯგუფებში კი პრევენციული ღონისძიებები გატარდება.
ქუნთრუშა მწვავე ინფექციური დაავადებაა, რომელიც ძირითადად ბავშვებში ვრცელდება. ახასიათებს ტემპერატურის აწევა, ანგინა და გამონაყარი კანზე. ქუნთრუშის გადატანის შემდეგ რჩება მყარი იმუნიტეტი. ინკუბაციური პერიოდი 2-7 დღე გრძელდება.
Loading ...