ოზურგეთის მერობისთვის ალექსანდრე მენაბდე იბრძოლებს

ოზურგეთში პარტიას “გახარია საქართველოსთვის” მერობის კანდიდატი ეყოლება. პარტიამ აღნიშნული ინფორმაცია რეგისტრაციის ბოლო დღეს გასაჯაროვა.

ოზურგეთის მუნიციპალიტეტის მერობისთვის ალექსანდრე მენაბდე იბრძოლებს და ის “ქართული ოცნების” კანდიდატის პაატა კუნჭულიას ერთადერთი კონკურენტი იქნება.

პარტიის მიერ მოწოდებული ინფორმაციით ირკვევა, რომ ალექსანდრე მენაბდე პროფესიით საერთაშორისო პოლიტიკის ანალიტიკოსია და ევროპულ ქვეყნებში სწავლის და მუშაობის გამოცდილება აქვს.

“ ალექსანდრე მენაბდე დაიბადა 1997 წლის 15 სექტემბერს, თბილისში.

პროფესიით საერთაშორისო პოლიტიკის ანალიტიკოსი.

2024 წლიდან ალექსანდრე მენაბდე აქტიურად არის ჩართული პარტიის “გახარია საქართველოსთვის” მუშაობაში.

2021 წელს მან წარჩინებით დაამთავრა ამერიკათმცოდნეობის ფაკულტეტი შავი ზღვის საერთაშორისო უნივერსიტეტში.
2017-2018 წლებში ვარშავის ვისტულას უნივერსიტეტში მიიღო განათლება საერთაშორისო ურთიერთობების განხრით. ამავე პერიოდში, პოლონეთში სწავლის დასრულების შემდეგ, ალექსანდრე მენაბდე იყო ერთ-ერთი ყველაზე ახალგაზრდა სამხედრო თარჯიმანი ნატოს ბაზაზე გერმანიაში, რომელიც 20 წლის ასაკში ავღანეთის ომისთვის ამერიკისა და საქართველოს ჯარების მოსამზადებელ წვრთნებში იყო არჩეული თარჯიმნად.
2021-2022 წლებში ალექსანდრე მენაბდე ცხოვრობდა ლატვიაში, მუშაობდა ევროკავშირის პროექტში. მიღებული აქვს ასევე მონაწილეობა უკრაინის მხარდასაჭერ ღონისძიებაში ლატვიაში.
2023 წელს ალექსანდრე მენაბდემ ჩეხეთის სამთავრობო სტიპენდია მიიღო და გაძლიერებულ ჯგუფში ერთადერთი იყო საქართველოდან, რომელიც პოლიტიკურ მეცნიერებას ჩეხურ ენაზე სწავლობდა კარლოვას უნივერსიტეტში
2024 წელს ალექსანდრე მენაბდე სლოვაკეთში, ბრატისლავაში, ივან კორჩოკის სახელობის დიპლომატიურ სკოლაში, პირველი უცხოელი იყო, ვინც განათლება მიიღო.
თავისუფლად ფლობს ინგლისურ, ფრანგულ, რუსულ, ჩეხურ და სლოვაკურ ენებს.”- ნათქვამია პარტიის მიერ მოწოდებულ ინფორმაციაში.