ოზურგეთის მერიისა და საკრებულოს ყოფილ და მოქმედ თანამშრომლებს ბრალი წარედგინათ

ოზურგეთის მერიისა და საკრებულოს ყოფილ და მოქმედ თანამშრომლებს სამსახურეობრივ გულგრილობასა და სახელმწიფო ქონების გაფლანგვაში ბრალი წარედგინათ. ანტიკორუფციული სააგენტო ინფორმაციას ადასტურებს და აცხადებს:

”2019 წლის 26 დეკემბერს ანტიკორუფციული სააგენტოს წარმოებაში არსებულ სისხლის სამართლის საქმეზე სამსახურებრივი გულგრილობისათვის, სსკ-ის 342-ე მუხლის 1-ლი ნაწილით ბრალდება წარედგინათ: ოზურგეთის მუნიციპალიტეტის გამგებლის ყოფილ მოადგილეს ა.ყ-ს, ოზურგეთის მუნიციპალიტეტის გამგეობის ინფრასტრუქტურის, არქიტექტურისა და ქონების მართვის სამსახურის ყოფილ უფროსს ბ.გ-ს, ოზურგეთის მუნიციპალიტეტის მერიის არქიტექტურის, ინფრასტრუქტურის, კომუნალური მომსახურების სერვისების სამსახურის ინფრასტრუქტურის განყოფილების სპეციალისტს ა.ბ-ს, ოზურგეთის მუნიციპალიტეტის მერიის არქიტექტურის, ინფრასტრუქტურის, კომუნალური და სივრცითი განვითარების სამსახურის ინფრასტრუქტურის განყოფილების უფროსს გ.ა-ს, ოზურგეთის მუნიციპალიტეტის საკრებულოს ანალიტიკური განყოფილების უფროსს გ.ჭ-ს. გამოძიებით დადგენილია, რომ მათ, როგორც კომისიის წევრებმა, დროულად არ აამოქმედეს ერთ-ერთი კომპანიის მიერ წარდგენილი ხელშეკრულებების შესრულების უზრუნველყოფის საბანკო და საავანსო გარანტიები, რითაც სახელმწიფოს მიადგა დიდი ოდენობით მატერიალური ზიანი.”