ჯერ კიდევ საარჩევნო კამპანიის პერიოდში იყო საუბარი იმაზე, რომ ”ქართული ოცნების” კანდიდატის ავთანდილ თალაკვაძის გამარჯვების შემთხვევაში ოზურგეთს ქალი ვიცე-მერი ეყოლებოდა. რამდენიმე დღის წინ ამ პოსტზე ეკა გოლიაძის სახელი და გვარი გაჟღერდა, რომელიც თალაკვაძის უახლოესი გარემოცვის წევრია. ამჟამად კი გავრცელებული ინფორმაციით, აღნიშნული თანამდებობის კონსტექსტში კიდევ ორი ქალის კანდიდატურის განხილვა დაიწყო.
მათგან ერთი ნინი შეწირული-გობრონიძეა. ის 2016-2018 წლებში სურსათის ეროვნული სააგენტოს გურიის რეგიონულ სამმართველოს ხელმძღვანელობდა. შემდეგ იყო ბიზნეს-სექტორში დასაქმებული. ნინი შეწირული ასევე იყო გურიის მაჟორიტარი დეპუტატობის კანდიდატი პარტია ”სამართლიანობისთვის” სახელით. 2021 წლის ადგილობრივი თვითმმართველობის არჩევნების დროს შეწირული უკვე გახარიას პარტიასთან ”საქართველოსთვის” გამოჩნდა და განაცხადა, რომ სავარაუდოდ პარტიული სიის პირველ ხუთეულში იქნებოდა, თუმცა მოგვიანებით აღნიშნული არ დადასტურდა. მალევე ნინი შეწირულმა ღია მხარდაჭერა ”ქართული ოცნების” კანდიდატს ავთანდილ თალაკვაძეს გამოუცხადა და მის კამპანიაში აქტიურად იყო ჩართული.
”გურიაTV” ესაუბრა ნინი შეწირულს, რომელმაც აღნიშნული შეთავაზება არც უარყო და არც დაადასტურა.
– არა, სიმართლე არ არის.
– ანუ კონსულტაციები თქვენს კანდიდატურასთან მიმართებაში არ მიმდინარეობს?
– არა, არა. ახლა საკმაოდ რთულ ვითარებაში ვარ, ოჯახის ახლობელი გარდამეცვალა და შესაბამისად, ამ ტრაგედიით ვარ მოცული. აღნიშნულ ინფორმაციას ვერ დავადასტურებ.
– შეიძლება თუ არა მერიაში სხვა რომელიმე პოზიციაზე გიხილოთ?
– ჯერჯერობით ვერაფერს გეტყვით ვერცერთ საკითხზე. შეგიძლიათ ასე თქვათ, რომ ვერც უარვყოფ და ვერც ვადასტურებ.
მეორე კანდიდატურა,რომლის სახელიც ოზურგეთის ვიცე-მერის კონსტექტში გაჟღერდა, ლელა საჯაიაა.
ლელა საჯაია, რომელიც პედაგოგია, ოზურგეთის საკრებულოს ორგზის წევრი იყო. მათ შორის მაჟორიტარი დეპუტატიც. ხელმძღვანელობდა განათლების, კულტურის, სპორტისა და სოციალურ საკითხთა კომისიას. ბოლო არჩევნებში კი საჯაია ზვანი-მოიდანახეს მაჟორიტარულ ოლქში ”ქართული ოცნების” კანდიდატი გახლდათ, თუმცა პარტია ”გახარია საქართველოსთვის” კანდიდატთან გიორგი სირაძესთან მეორე ტურში დამარცხდა.
ვიცე-მერად მისი კანდიდატურის განხილვა არც ლელა საჯაიამ დაადასტურა.
– ვერანაირად ვერ დავადასტურებ მაგ ინფორმაციას.
– არის თუ არა სიახლეები თქვენს კარიერაში და შეიძლება თუ არა რომელიმე თანამდებობაზე გიხილოთ?
– ამჟამად ვერაფერს დაგიდასტურებთ, არსად ვარ მაგ მიმართულებით, თუმცა ვნახოთ, მომავალში. – განაცხადა ლელა საჯაიამ.
ოზურგეთის მუნიციპალიტეტის ახალი მერი უფლებამოსილების შესრულებას 24 ნოემბრიდან შეუდგება. სავარაუდოდ, ამ დროისთვის დასახელდება ვიცე-მერის და სხვა თანამდებობის პირების სახელებიც, თუმცა იქამდე ჯერ კიდევ დროა და შესაბამისად, მერიის სავარაუდოდ მაღალჩინოსნებად კიდევ არაერთი სახლეი და გვარი გაჟღერდება.
Loading ...