ოზურგეთის ავტოსადგური განახლდება, მოეწყობა დედათა და ბავშვთა ოთახები და მძღოლის სივრცეები – რა სიახლეებია დაგეგმილი

საზოგადოებრივ ტრანსპორტთან და საქალაქთაშორისო გადაზიდვებთან დაკავშირებით კანონმდებლობაში სიახლეები შედის.

საქალაქთაშორისო გადაყვანებთან დაკავშირებით რამდენიმე ახალი რეგლამენტი 2024 წლის განმავლობაში დამტკიცდა. ამ რეგლამენტებს შორის არის ავტოსადგურების მოწესრიგების ვალდებულებაც. კერძოდ, ავტოსადგურები აღჭურვილი უნდა იყოს მძღოლის მოსასვენებელი სივრცით, სამედიცინო პუნქტით, საპირფარეშოებით, მგზავრების მოსაცდელი სივრცით.

ასევე სიახლეა ისიც, რომ 1 მარტიდან მძღოლები ვალდებულები არიან წელიწადში ერთხელ სამედიცინო შემოწმების დამადასტურებელი დოკუმენტაცია და ნარკოშემოწმების ცნობა წარმოადგინონ.

განსაკუთრებით მნიშვნელოვანია ცვლილებები საქალაქთაშორისო გადაზიდვებთან დაკავშირებით. 150 კმ-ზე მეტი მანძილით დაშორებულ დასახლებულ პუნქტებს შორის გადაზიდვების განხორციელების უფლება ექნებათ მხოლოდ 5 ტონაზე მეტი წონის მქონე M3 კატეგორიის ავტოსატრანსპორტო საშუალებებს. რაც ნიშნავს, რომ მალე ოზურგეთიდან თბილისამდე მგზავრთა გადაყვანას მხოლოდ ავტობუსები განახორციელებენ და მიკროავტობუსები ამ დისტანციაზე აღარ ივლიან.

ოზურგეთის ავტოსადგურის, იგივე შპს ”აის პლუსის” დირექტორი შაკო ორაგველიძე ამბობს, რომ ავტოსადგურის ინფრასტრუქტურა მნიშვნელოვნად განახლდება.

”სიახლეები ჩვენს სადგურსაც ეხება. სადგურები უნდა გახდეს სერტფიცირებული და დაიყოს სამ კატეგორიად, ჩვენი ავტოსადგურიც შესაბამის სერთიფიკატს მიიიღებს. გათვალისწინებულია ინფრასტრუქტურის განახლება, მოეწყობა ლოდინის სივრცეები, სადგომები, მძღოლთა მოსასვენებელი ოთახები, დედათა და ბავშვთა ოთახები.

რაც შეეხება 150 კილომეტრზე გრძელ დისტანციაზე მიკროავტობუსების აკრძალვას, როგორც ვიცით 1 ივნისიდან შედის ძალაში. მძღოლები თვითონ შეიძენენ თუ არა ავტობუსებს, ეს დეტალები არ ვიცი, ჩვენ ავტოსადგური ვართ და გადამზიდავებს ვემსახურებით.” – აღნიშნა შაკო ორაგველიძემ

მძღოლებს სიახლეები ავტოსადგურთან დაკავშირებით მოსწონთ, განახლებულ ინფრასტრუქტურას დადებითად უყურებენ, მაგრამ ეჭვობენ, რომ 150 კილომეტრზე მეტ მანძილზე მოძრავი მიკროავტობუსების მძღოლები დიდი გამოწვევის წინაშე არიან. მათ დიდ უმრავლესობას ავტობუსის შესაძენი ფული არა აქვს, შესაბამისად, გაურკვეველია რა გამოსავალს იპოვნიან ისინი.

”ავტოსადგურის განახლება ნამეტანი კაია, მაგას რა ჯობია, მგზავრიც მეტი იქნება, მაგრამ ამ ხალხს რა ეშველება, ნაყიდი რომ ჰყავთ ეს მიკროავტობუსები, ბევრი ფული აქვთ გადახდილი და ავტობუსს როგორ იყიდიან, ამდენი ფული ვის აქვს. მუშაობა ისედაც არ არის, ცარიელი მიდის მანქანები რეისში.” – თამაზ შათირიშვილი, მძღოლი.

ცვლილებების გარკვეული ნაწილი უკვე ამოქმედდა, ნაწილი კი ძალაში 1 ივნისიდან შევა. სატრანსპორტო რეფორმის დასრულებას ხელისუფლება 2025 წლის ბოლომდე გეგმავს.