ოზურგეთელ მორაგბეებს ლიგაში ადგილის შესანარჩუნებლად პლეი-ოფში ასპარეზობა მოუწევთ

დღეს, საქართველოს პირველობაზე რაგბიში პირველი ლიგის გუნდებს შორის, ოზურგეთის „არწივებმა“ აუტსაიდერს, „აკადემიას“ უმასპინძლა და დიდი ანგარიშით 43:5 დაამარცხა.

მოიგო „არწივების“ კონკურენტმა „ფოთმა“, რომელმაც ანგარიშით 28:7 დაამარცხა თბილისის „ლოკომოტივი“, 25 ქულა მოაგროვა და მე-8 ადგილი დაიკავა. ამ გამარჯვებით “ფოთმა” პირველ ლიგაში ადგილი შეინარჩუნა.

რაც შეეხება “არწივებს”,  იგი 23 ქულით მე-9 ადგილზე გავიდა და ლიგაში დასარჩენად პლეი ოფის შეხვედრები მოუწევს რეგიონლიგის წარმომადგენელთან.

პირველი ლიგის ჩემპიონი „გორი“ გახდა, 77 ქულით, ხოლო მეორეზე პატარძეულის „ვეფხვები“ გავიდნენ, 62 ქულით.