”გურიაTV”-ს აღშფოთებული, ახალგაზრდა მამაკაცი დაუკავშირდა. როგორც ზაზა ონიანი ამბობს, ექვსი დღის წინ საპატრულო პოლიციამ კომენდანტის საათის დარღვევის გამო დააჯარიმა, თუმცა განსაკუთრებული გარემოებები, რომელშიც ლიხაურში მცხოვრები მამაკაცი მეუღლესთან ერთად აღმოჩნდა, პატრულმა არ გაითვალისწინა.
”ჩემი მეუღლე ცხრა თვის ფეხმძიმეა, ამიტომ ყველა წუთს ველოდებით, რომ მშობიარობა დაეწყება. ექვსი დღის წინ მარიამს ძლიერი ტკივილები დაეწყო. უკვე ღამის 23:00 საათი იყო და, ცხადია, კომენდანტი უკვე დაწყებული იყო, თან ნასვამი ვიყავი. 112 – თან დაკავშირება ვერ მოვახერხე, ამიტომ 144- ზე დავრეკე, რომ დამხმარებოდნენ ამ სიტუაციასთან გამკლავებაში. არაერთი მცდელობის მიუხედავად, 144-ზე არავინ მიპასუხა. დრო აღარ ითმენდა. ჩვენთან ერთად არავინ იყო და ამიტომ იძულებულები გავხდით, საჭესთან ჩემი მეუღლე დამჯდარიყო, რომელსაც მართვის მოწმობა არა აქვს. სოფელ ლიხაურიდან წამოვედით ქალაქში, რომ კლინიკაში დროულად მივსულიყავით. პატრულმა მალევე გაგვაჩერა. მიუხედავად იმისა, რომ ყველაფერი ავუხსენით, ეკიპაჟმა არცერთი გარემოება არ გაითვალისწინა. არაფრად ჩააგდო, რომ მეუღლეს ძლიერი ტკივილები ჰქონდა დაწყებული, 20 წუთზე მეტი ქუჩაში, სიცივეში ამყოფა. ამასობაში, კლინიკის მედპერსონალიც გამოვიდა, ისინიც ეუბნებოდნენ პატრულს, ადამიანის სისხლი ხომ გაქვთ, შემოუშვით პაციენტიო, მაგრამ საავადმყოფოშიც არ შეგვიშვეს იქამდე, ვიდრე საჯარიმო ქვითარზე ხელი არ მოვაწერეთ. საბოლოოდ კი მე და ჩემს მეუღლეს დაგვიწერეს 2000 – 2000 ლარის ოდენობის ჯარიმა კომენდანტის საათის დარღვევისთვის, პლუს 500 ლარი მეუღლეს, მართვის მოწმობის გარეშე საჭესთან ჯდომისთვის და 700 ლარი მართვის მოწმობის არმქონე პირისთვის ავტომობილის გადაცემის გამო. საბოლოოდ, 5200 ლარი გვაქვს გადასახდელი იმისთვის, რომ ტკივილებდაწყებული, ფეხმძიმე მეუღლე კლინიკაში იყო მისასვლელი.
საბოლოოდ, მარიამს თირკმლის შეტევა ჰქონია, შესაბამისად, ბავშვს ისევ დღე-დღეზე ველოდებით, ამიტომ დღეს კლინიკაში ვიყავი და საშვი ვითხოვე, რომ თუ საავადმყოფოში წამოსვლა ისევ კომენდანტის საათის დროს დაგვჭირდა, პატრულმა იგივე არ გააკეთოს.
ამ საქმის ასე დატოვებას არ ვაპირებ. აუცილებლად ავიყვან ადვოკატს, მოვამზადებ სარჩელს და სასამართლოში შევიტან. ეს არ არის ადამიანების საჭიროებებსა და პრობლემებზე მორგებული კანონი და აუცილებლად ვიბრძოლებ სამართლიანობისთვის. ჩვენ კარგი, მაგრამ კიდევ სხვებსაც შეუქმნიან იგივე პრობლემას და არ გაითვალისწინებენ ასეთ განსაკუთრებულ შემთხვევებს. სარჩელის მომზადების მიზანი სწორედ ეგეც არის, რომ მომავალში სხვა ადამიანებს არ დაემართოთ იგივე.” – უყვება ”გურიაTV”- ს ზაზა ონიანი.
”გურიაTV” ამ თემაზე უახლოეს დღეებში ვრცელ სიუჟეტს შემოგთავაზებთ.
Loading ...
