Earth’s Future-ში გამოქვეყნებული კვლევის მიხედვით, ნიუ-იორკი იძირება და ამის მიზეზი ცათამბჯენების მასაა. ამ დასკვნამდე მისასვლელად, მეცნიერებმა ქალაქის გეოლოგია და სატელიტური მონაცემები შეადარეს ერთმანეთს.
ამ მოვლენის ტექნიკური შესატყვისი „ნიადაგის დაჯდომაა“, რაც დედამიწის ზედაპირის თანდათანობით ან მოულოდნელ დაწევას გულისხმობს. მიზეზად კი რბილი დანალექი ქანების მოძრაობა ან მეტისმეტი სიმძიმის ზეწოლა სახელდება. კვლევის ფარგლებში კი გაირკვა, რომ ნიუ-იორკი წელიწადში, საშუალოდ, 1-2 მილიმეტრით დაბლა იწევს; ხოლო ზოგიერთ ადგილას ეს მაჩვენებელი კიდევ უფრო მეტია. ალბათ, ჩვენი გადმოსახედიდან არც თუ ისე დიდ ციფრებად გვეჩვენება, მაგრამ ქალაქისთვის ნამდვილად საყურადღებოა.
როგორც გეოლოგები ვარაუდობენ, დეფორმაციამ შეიძლება რეალური პრობლემები შეუქმნას ქალაქს, სადაც 8 მილიონზე მეტი ადამიანი ცხოვრობს. „ნაშრომის მიზანი ცნობიერების ამაღლებაა, რადგან არქიტექტორებმა გააცნობიერონ, რომ ყოველი დამატებითი მაღალსართულიანი შენობა შეიძლება ახალი საფრთხე იყოს წყალდიდობის ხელშეწყობისთვის“, — წერენ მკვლევრები.
საფრთხეების განსასაზღვრად, მკვლევრებმა ქალაქის ნაგებობების ჯამური მასა გამოთვალეს, რაც დაახლოებით 764 000 ტონას უდრის. მათ ნიუ-იორკის კომპლექსური გეოლოგიაც გაითვალისწინეს: ქვიშა, შლამი, თიხა და ქვენაფენი ქანების გაშიშვლებაც. როგორც გაირკვა, თიხით მდიდარ და ხელოვნურად შევსებულ მიწას დაჯდომა მეტად ემუქრება; ხოლო ქვენაფენ ქანებს — ნაკლებად.
„ნიუ-იორკი მზარდი სანაპირო ქალაქების სიმბოლოა მთელ მსოფლიოში, რომლებიც თანდათან მცირდება. ეს კი იმას ნიშნავს, რომ საერთო გლობალური გამოწვევის წინაშე ვიმყოფებით დატბორვის საფრთხის კუთხით“, — ასკვნიან კვლევის ავტორები.
წყარო – მარკეტერ.გე
Loading ...