ნინო ჯანგირაშვილი არხის ანგარიშზე ინკასოს დადებაზე – ტელევიზია აპირებს, რომ მუშაობა და ფუნქციონირება განაგრძოს-ინკასო ვერ შეგვაშინებს

მიუხედავდ პრობლემებისა ტელევიზია აპირებს, რომ მუშაობა და ფუნქციონირება განაგრძოს,-ამის შესახებ „ინტერპრესნიუსს“ ტელეკომპანია „კავკასიას“ გენერალურმა დირექტორმა ნინო ჯანგირაშვილმა ტელეკომპანიის ანგარიშზე ინკასოს დადებასთან დაკავშირებით განუცხადა.

მისივე განმარტებით, ამ ეტაპზე ტელეკომპანია „კავკასიას“ დავალიანების დასაფარი თანხა არ აქვს, მაგრამ რომც ჰქონდეს არ დაფარავენ, ვინაიდან ეს მათთვის პრინციპული საკითხია.

„მიუხედავად პრობლემებისა, ტელევიზია აპირებს, რომ მუშაობა და ფუნქციონირება განაგრძოს. ინკასო ნამდვილად ვერ შეგვაშინებს. ამ ეტაპზე ჩვენ დავალიანების დასაფარი თანხა არც გვაქვს, მაგრამ რომც გვქონდეს არ დავფარავდი იმიტომ, რომ ეს ჩემთვის პრინციპული საკითხია. მე ცხადად ვთქვი ჩემი პოზიცია, სანამ არ მეტყვიან როდის აპირებენ „რუსთავი 2“-სგან, „იმედისგან“ და „მაესტროსგან“ 55 მილიონის ამოღებას, რომელიც მათ წლების მანძილზე დაუგროვდათ, რომლის გადახდაც არავინ არასდროს არ მოსთხოვათ, სანამ ამას სახელმწიფო არ მეტყვის, მე არ ვაპირებ მორჩილი, კარგი გოგო ვიყო. გარკვეული ტიპის გადავადება უკვე ჩუქებას ნიშნავს და თუ სახელმწიფო აპირებს, რომ მათ ეს თანხა აჩუქოს, მაშინ ჩემი და არა მხოლოდ ჩემი, ყველა სხვა არხის პროტესტი იქნება ძალიან სერიოზული, ვინაიდან, ეს არის საბაზრო უპირატესობის მინიჭება 3 არხისთვის, ეს არის კონკურენციის განადგურება ამ ქვეყანაში და ეს არის მედიის მოსპობა. ასე ვეღარ გაგრძელდება.

მე „ტვ პირველისგან“ განსხვავებით ფინანსთა სამინისტროში გადავადებასთან დაკავშირებით მოთხოვნა არ გამიგზავნია. მე ველოდებოდი მათ ქმედებას და ახლა შემდეგი სერია იწყება. „რუსთავი 2“-ს თუ დაადეს ინკასო ეს არაფერს არ ნიშნავს. „რუსთავი 2“-ს ყოფნის თავხედობა და არათუ ძველ დავალიანებას არ იხდის, არამედ მიმდინარეც კი არ გადაიხადა და იმასაც არ ამბობს, რას ითხოვს. „რუსთავი 2“-ს რადგან, ინკასო დაადეს, მათი ჭკუით, კვალი დამალეს და დამოუკიდებელი მედიის დევნა აღარ გამოდის. ამ დროს დამოუკიდებელი მედიის დევნაა, არათანაბარ პირობებში ჩაყენება და ფინანსური მოხრჩობაა“,-განაცხადა ნინო ჯანგირაშვილმა.

მისივე განმარტებით, ის თანხა , რაც ტელეკომპანია „კავკასიას“ ანგარიშზე იყო დავალიანების დასაფარად საკმარისი არ არის. მათი დავალიანება დაახლოებით 24 000 ლარია.

ცნობისთვის, ტელეკომპანიების: „რუსთავი2“, „ტვ პირველი“ და „კავკასია“ საბანკო ანგარიშებს ინსკასო დაედო.

www.interpressnews.ge