ნიკა მაჭუტაძის პარტიის პოლიტსაბჭოს თავმჯდომარე ნატო ჩხეიძე გახდა

პარლამენტის წევრი ნატო ჩხეიძე „მოძრაობა სახელმწიფო ხალხისთვის“ თავმჯდომარე გახდა.

ამის შესახებ მოძრაობის თავმჯდომარემ, ნიკა მაჭუტაძემ დღევანდელ ბრიფინგზე განაცხადა.

„ძალიან ფართო და სიღრმისეული, შრომატევადი მოლაპარაკებების შედეგად წარმოგიდგენთ „მოძრაობა სახელმწიფო ხალხისთვის“ განახლებულ შემადგენლობას. ჩვენ გვყავს ახალი პოლიტიკური საბჭო საქართველოს საუკეთესო მოქალაქეებისგან დაკომპლექტებული და ამ საბჭომ თავის თავმჯდომარედ აირჩია საქართველოს პარლამენტის წევრი და საქართველოს საუკეთესო მოქალაქე, ნატო ჩხეიძე. ჩვენი პარტია, ქალბატონი ნატოს მეოხებით, გავხდით საპარლამენტო პარტია და ამისთვის მადლობას მას და მის მეუღლეს ზაზა ოქუაშვილს. მადლობა იმ დამსახურებისთვის, რაც მათ მიუძღვით ქართული ოპოზიციისა და ქართული დემოკრატიული საზოგადოების წინაშე, იმ ბრძოლის საქმეში, რომლესაც ჰქვია ოლიგარქიის დამარცხება და ქართული სახელმწიფოს აღდგენა“, – განაცხადა ნიკა მაჭუტაძემ.

როგორც ნატო ჩხეიძემ აღნიშნა, პოლიტიკოსისთვის აუცილებელია გუნდურობა, გუნდის წევრობა, რადგან პოლიტიკური გუნდი ქმნის კარგად და სასიკეთო რეალობას ქვეყანაში.

„დამოუკიდებელი დეპუტატობა კარგი რამ არის პარლამენტში, რადგან გადაწყვეტილებებს სრულიად დამოუკიდებლად იღებ. პოლიტიკოსისთვის აუცილებელია გუნდურობა, გუნდის წევრობა, რადგან პოლიტიკური გუნდი ქმნის კარგა და სასიკეთო რეალობას ქვეყანაში, მითუმეტეს აუცილებელია ოპოზიციური გუნდის წევრობა, მაში როდესაც აშკარად ხედავ, რომ ცუდი მთავრობა ცუდად მართავს ქვეყანას და აშკარად სასიცოცხლოდ აუცილებელია ამ ცუდი მთავრობის შეცვლა. მივიღე შემოთავაზება, ვყოფილიყავი „მოძრაობა სახელმწიფო ხალხისთვის“ პოლიტიკური ლიდერი, რადგან ამ პარტიის სახელწოდებაში განსხეულებული სათაური „სახელმწიფო ხალხისათვის“ არის ჩემი პოლიტიკური კრედო, რომ სახელმწიფო არსებობს თითოეული მოქალაქისთვის. ჩვენი წინაპრების ცხოვრება გვასწავლის, როგორ უნდა ვიშრომოთ ჩვენი ქვეყნისთვის, მათი თავდადება სახელმწიფოსთვის გვასწავლის, როგორ უნდა ვიყოთ თავგანწირული ჩვენი მომავლისთვის. გაერთიანებული ოპოზიცია არის ის, ვისაც შეუძლია ამ მატყუარა და კრიმინალი მთავრობის შეცვლა. ჩვენ ვართ ის, ვინც უნდა მივცეთ მომავალი ხალხს. მადლობა ნდობისთვის და ძალისხმევას არ დავიშურებ, რომ თქვენი ნდობა გავამართლო“, – განაცხადა ნატო ჩხეიძემ.