ნიდერლანდებში ცნობილი სოფლის ზანზე შხანსი-ს სანახავად გადასახადი დაწესდება – ლაშა ჩხაიძის რუბრიკა

ულამაზესი სოფელი ნიდერლანდებში, ზანზე შხანსი (Zaanse Schans), თავსატეხის წინაშე დამდგარა. ისტორიული სოფელი, სადაც უამრავი ქარის წისქვილი დგას, ყოველ წელს აურაცხელ ტურისტს იზიდავს. აქ გადაღებული ფოტოები პოპულარობით სარგებლობს და თან სოფელი ადვილად ხელმისაწვდომია დამთვალიერებლებისათვის, ამსტერდამის ცენტრალური რკინიგზიდან მხოლოდ 18 წუთია საჭირო მატარებლით, რომ მავანი აქ მოხვდეს.

თურმე სოფელი გასულ წელს 2.6 მილიონმა ადამიანმა მოინახულა და ეს წარმოუდგენლად დიდი რიცხვია ასეთი პატარა ადგილისთვის, რომლის მოსახლეობა მხოლოდ 100 მაცხოვრებელს ითვლის.

ადგილობრივ სოფსაბჭოს განუზრახავს, მომავალი წლიდან დამთვალიერებლებისათვის 17,5 ევროს ოდენობის გადასახადი დააწესოს, რათა ტურისტულმა ნაკადმა იკლოს და კონტროლირებადიც იყოს, თორემ სოფლის მოსახლეობა ჩივის, თურმე ტურისტები სახლებში დაუკითხავად შედიან და სხვა პრობლემებსაც ქმნიანო.

მეორე მხრივ, სოფელში მდებარე ბიზნესის წარმომადგენლები უკმაყოფილოები არიან, რადგან ტურისტული ნაკადის შემცირება მათ ბიზნესზე ცუდად აისახება.

ვენეცია ყველაზე ცნობილი ადგილია, სადაც მსგავი გადასახადი დაწესდა და დღიურად 5 ევროს გადახდაა საჭირო. ბუტანშიც არსებობს ქვეყანაში შესვლის  და დღიური გადასახადი. სოფლები, სადაც შესვლისთვის თანხას გადაიხდით, არსებობს ინგლისში, იტალიაში და ინდონეზიაში.