იტალიის ქალაქ ნეაპოლში დაკარგული 27 წლის სალომე ტეტუნაშვილი ნაპოვნია. ინფორმაციას რადიო თავისუფლებას უდასტურებს საგარეო საქმეთა სამინისტრო.
ქალის პოვნის შესახებ ინფორმაცია თავდაპირველად იტალიაში დაფუძნებულმა ქართულმა საინფორმაციო სააგენტო “Exclusive TV”-მ იტალიაში მცხოვრებ, თარჯიმანსა და მედიატორ მაკა ხაჩოშვილზე დაყრდნობით გაავრცელა.
მაკა ხაჩოშვილი რადიო თავისუფლებას ეუბნება, რომ დაახლოებით ერთი საათის წინ, მას სოციალურ ქსელში დაუკავშირდა მუნიციპალური პოლიციის თანამშრომელი, რომელმაც შეატყობინა, რომ სალომე ტეტუნაშვილი ქალაქ ნეაპოლში, ქუჩაში ნახა და ის მის გვერდით იმყოფება:
„სალომეს ფოტო და ინფორმაცია იტალიურ ენაზე სოციალურ ქსელში მქონდა გამოქვეყნებული. სწორედ ამ პოსტისა და ფოტოს საფუძველზე დამიკავშირდა პოლიციელი, რომელმაც მითხრა, რომ სალომე მის გვერდით იმყოფებოდა, ქუჩაში. პოლიციელმა სალომეს ტელეფონი მიაწოდა. ველაპარაკე, დამიდასტურა, რომ ნამდვილად სალომეა. არეული ჩანდა. ვერ ხვდებოდა, რატომ ეძებდნენ. მკითხა, რა ხდება, იტალიაში ვარო. პოლიციელმა გადმომიგზავნა ლოკაცია, მისამართი, ტელეფონის ნომერი. ეს ინფორმაცია მივაწოდე ოჯახის წევრებს და მეგობრებს, რომლებიც ახლა მასთან მიდიან“.
როგორც მაკა ხაჩოშვილი ამბობს, ამ ზარს, ნახევარი საათით ადრე, წინ უძღოდა კიდევ ერთი ზარი, რომლის თანახმადაც, სალომე ტეტუნაშვილი ნეაპოლში, კლინიკაში „ოსპიტალე დელ მარეში“ ნახეს.
რადიო თავისუფლება ელაპარაკა იტალიაში მცხოვრებ ნინო ლაფაჩიძეს, სოციალური ასოციაციის პრეზიდენტს, რომელსაც პირადად დაუდასტურა იტალიაში საქართველოს კონსულმა, რომ ნეაპოლში, ქუჩაში ნაპოვნი ქალი ნამდვილად სალომე ტეტუნაშვილია:
„საკონსულო ადასტურებს, რომ ნამდვილად სალომეა. მიმდინარეობს გამოძიება, სად იმყოფებოდა ეს გოგო ამ დღეების განმავლობაში, რა მდგომარეობაში. მას ეს დღეები ტელეფონი გათიშული ჰქონდა და ახლა ჩართო“.
27 წლის სალომე ტეტუნაშვილი ნეაპოლში, ერთ-ერთ ოჯახში მომვლელად მუშაობდა. ის 22 იანვარს, საღამოს, დაახლოებით 10 საათისთვის, საყოფაცხოვრებო ნარჩენების გადასაყრელად გავიდა სახლიდან და უკან აღარ დაბრუნებულა. მისი გაუჩინარების შესახებ ინფორმაცია დედამ რამდენიმე საათში, სწორედ იმ ოჯახისგან შეიტყო, სადაც სალომე მუშაობდა.
25 იანვარს, ღამით, სამძებრო სამუშაოებისა და საგამოძიებო მოქმედებების ჩატარების მოთხოვნით, ქალაქ ნეაპოლში ქართველმა ემიგრანტებმა აქცია გამართეს. რამდენიმე ათეული ემიგრანტი სწორედ იმ სახლთან შეიკრიბა, სადაც სალომე ტეტუნაშვილი მუშაობდა.
26 იანვარს, საქართველოს საელჩომ იტალიაში, სოციალურ ქსელში განცხადება გამოაქვეყნა, რომელშიც წერდა, რომ საკონსულოს მოთხოვნით, საქმეში უკვე ორი დღეა აქტიურად არიან ჩართული იტალიის ადგილობრივი სამართალდამცავი უწყებები.
სალომე ტეტუნაშვილი წარმოშობით ლაგოდეხის მუნიციპალიტეტიდან არის. სალომე იტალიაში წასვლამდე სოფელ თელაში ცხოვრობდა. მეზობლები ამბობენ, რომ სალის მამა რამდენიმე წლის წინ გარდაიცვალა, დედა-შვილი კი იტალიაში დაახლოებით ორი წლის წინ წავიდა და ისინი სხვადასხვა ოჯახში მუშაობდნენ.
www.radiotavisupleba.ge
Loading ...
