სატვირთო მანქანის მძღოლის ანალიზის საბოლოო პასუხი, რომელიც ჩოხატაურის მუნიციპალიტეტის სოფელ ნაბეღლავში, კომპანია “წყალი მარგებელში” იმყოფებოდა, დღეს ლუგარის ლაბორატორიიდან გახდება ცნობილი.
დაავადებათა კონტროლის ეროვნული ცენტრის გურიის განყოფილების ინფორმაციით, აღნიშნულ პირს 9 ივნისს ჩატარებული კვლევის შედეგად COVID -19 არ აღმოაჩნდა. 10 ივნისს ის ჩოხატაურში “წყალი მარგებელში” ჩავიდა, საიდანაც პროდუქცია წაიღო. მორიგი გეგმიური გადამოწმებისას 14 ივნისს მძღოლს COVID- 19 ისევ არ დაუდგინდა, თუმცა 16 ივნისს PCR ტესტმა დადებითი პასუხი აჩვენა.
“სოფელ ნაბეღლავში განგაშის საფუძველი არ არსებობს. მძღოლს არ ჰქონია კონტაქტი არავისთან, ავტომანქანიდან არ ჩამოსულა და მალევე განაგრძო გზა. თუმცა ეპიდკვლევა მაინც მიმდინარეობს, რათა ყველა ნიუანსი ვიცოდეთ,” – განაცხადა დაავადებათა კონტროლის ეროვნული ცენტრის გურიის განყოფილების უფროსმა არჩილ მჟავიამ.
მძღოლი, რომელიც საერთაშორისო გადაზიდვებზე მუშაობდა, მჟავიას განცხადებით, თბილისის ინფექციურ საავადმყოფოში იმყოფება. ჩოხატაურის საზოგადოებრივი ჯკანდაცვის ცენტრის ხელმძღვანელის ნატო ჯიბუტის განცხადებით, აღნიშნული პირის ანალიზის პასუხს ლუგარის ლაბორატორიიდან დღეს მიიღებენ.
რაც შეეხება კომპანიას ”წყალი მარგებელი”. კომპანიამ ფაქტთან დაკავშირებით შემდეგი განცხადება გააკეთა:
”მოგეხსენებათ, რომ 18 ივნისის მონაცემებით, საქართველოში დაფიქსირდა კორონა ვირუსის 5 ახალი შემთხვევა.
ერთ-ერთი შემთხვევა საექსპორტო ტვირთის ტრაილერის მძღოლს უკავშირდება, რომელიც კონტრაქტორი სატრანსპორტო კომპანიის მიერ იყო დაქირავებული.
საექსპორტო ტრაილერის მძღოლი 10 ივნისს სს“ წყალი მარგებლის“ საწყობთან, დასატვირთად იმყოფებოდა. მას სს „წყალი მარგებლის“ არცერთ თანამშრომელთან უშუალო შეხება არ ჰქონია.
სს „წყალი მარგებლის“ წარმომადგენლის მიერ მოხდა აღნიშნული ფაქტის მიწოდება ჯანდაცვის სახელმწიფო ორგანიზაციებთან, მათთან შეთანხმებითა და რეკომენდაციით, დაზღვევის მიზნით ქარხნის გარეპერიმეტრის ორი თანამშრომელი იზოლაციაში იმყოფება, რომელთა მიერ სამსახურეობრივი მოვალეობის შესრულება, წესების სრული დაცვით ხორციელდებოდა.
ასევე აღვნიშნავთ, რომ სატრანსპორტო კომპანიის მიერ მოწოდებული ინფორმაციის თანახმად, ტრაილერის მძღოლს ქარხანაში ვიზიტამდე ერთი დღით ადრე, 9 ივნისს ჩატარებული ჰქონდა ტესტი, რომელიც იყო უარყოფითი.
საექპორტო ტრაილერის მძღოლს ვირუსი ლარსის გამშვებ პუქნტზე დაუდასტურდა.
ვირუსის გავრცელების პირველივე დღიდან სს „წყალი მარგებლის“ ქარხნის ტერიტორიაზე მკაცრად კონტროლდება უცხო პირთა შესვლა და გადაადგილება.
ასევე მკაცრად არის დაცული, ჯანდაცვის სახელმწიფო ორგანიზაციის მიერ გაცემული ინსტრუქცია საექსპორტო ტრაილერის მძღოლებთან დაკავშირებით, რომლის მიხედვითაც ტრაილერის მძღოლს ქარხანაში ვიზიტამდე არაუმეტეს 72 საათისა, აღებული უნდა ჰქონდეს ტესტი ვირუსთან დაკავშირებით.
შესაბამისად აღვნიშნავთ, რომ სს „წყალი მარგებლის“ ყველა თანამშრომელი არის ჯანმრთელი და მათ პირდაპირი კონტაქტი დაინფიცირებულ მძღოლთან არ ჰქონიათ.” – აცხადებენ კომპანიაში.
Loading ...