პოლიციამ მძღოლი, რომელმაც რუსთაველზე აქციისთვის საჭირო აპარატურა მიიტანა, 1000 ლარით დააჯარიმა და მართვის მოწმობა ჩამოართვა. ამის შესახებ ენმ-ს წევრმა თენგო თევზაძემ განაცხადა. მისი თქმით, “დაახლოებით ათმა ეკიპაჟმა ალყაში მოაქციეს, გადმოიყვანეს მძღოლი მანქანიდან”. “მანქანა კი გასტაცეს”.
“დაახლოებით, ათი ეკიპაჟი მოვიდა, ალყაში მოგვაქციეს, გადმოიყვანეს მძღოლი მანქანიდან. ამ პოლიციელებმა მანქანა წაიყვანეს, გაგვტაცეს. მძღოლი ათასი ლარით დააჯარიმეს და მართვის უფლება შეუჩერეს ერთი წლით, ადამიანს, რომელსაც არაფერი დაშავებია. ამათთან სამართლებრივ დავას, რა თქმა უნდა, აზრი არ აქვს, მაგრამ როგორ არიან შეშინებულები, ცხადია. ბრძოლა გაგრძელდება, ამათი არავის ეშინია, ამ ლაჩარი და კუდში მადევარი ხალხის. ჩვენ არ ვაპირებთ უკან დახევას, ბრძოლა იქნება ბოლომდე”, — განაცხადა თენგო თევზაძემ (კომენტარს IPN ავრცელებს).
პარტია “დროას” მომხდართან დაკავშირებით განცხადება გაავრცელა და საზოგადოებას მძღოლს მხარდაჭერისკენ მოუწოდა:
“ერთად დავეხმაროთ აქციის პიკაპის მძღოლს!
26 მაისის აქციის დასრულების შემდეგ, პოლიციამ მას მანქანა და ტექნიკა ჩამოართვა. დამატებით, გამოუწერეს ჯარიმა და 1 წლით ჩამოართვეს მართვის მოწმობა.
ეს მანქანა მისი შემოსავლის ერთადერთი წყაროა, ამიტომ ახლა განსაკუთრებით სჭირდება მხარდაჭერა. პრაქტიკულად, 1 წელი რჩება შემოსავლის გარეშე, რუსული რეჟიმის შურისძიების გამო.
ნებისმიერი თანხა მნიშვნელოვანია! გთხოვთ, გაავრცელოთ ინფორმაცია.
ანგარიშის ნომრები:
საქართველოს ბანკი: #GE14BG0000000538601012
თი ბი სი #GE02TB7486045068100026
მიმღები: ნიკა ქვარცხავა”, — წერს “დროა”.
შეგახსენებთ, რომ მანამდე პოლიციამ ოპოზიციის ალიანსს რუსთაველზე არც სცენის გამართვის უფლება მისცა და არც ხმის გამაძლიერებლის შეტანის. როგორც თბილისის საპატრულო პოლიციის მთავარი სამმართველოს უფროსმა, გოგა მემანიშვილმა განაცხადა, ალიანსს აქციაზე ტექნიკა შესაბამისი ნებართვა არ ქონის გამო არ შეატანინეს.
ოპოზიციის ალიანსმა შსს-ში განაცხადი აქციის გამართვაზე 25 მაისს მეორედ შეიტანა, მაგრამ უწყებას განაცხადის განხილვის 5-დღიანი ვადა აქვს და 26 მაისის აქცია ისე ჩატარდა, აქციის ორგანიზატორებს პასუხი არ მიუღიათ. ამის მიუხედავად, ოპოზიციამ საპროტესტო აქციისთვის საჭირო აღჭურვილობის შეტანა პიკაპით შეძლო, რის შემდეგაც მანქანის მძღოლი დააჯარიმეს და მართვის მოწმობაც ჩამოართვეს.
Loading ...