მსახიობები ანა ტყებუჩავა და ბაჩო ქაჯაია სასამართლომ 5 000-5 000 ლარით დააჯარიმა

მსახიობი ანი ტყებუჩავა სასამართლომ ადმინისტრაციულ სამართალდარღვევად ცნო.

აღნიშნული გადაწყვეტილება თბილისის საქალაქო სასამართლოს მოსამართლემ ნინო ენუქიძემ მიიღო.

ანი ტყებუჩავას ადმინისტრაციული სახდელის სახით 5 000-ლარიანი ჯარიმა დაეკისრა.

შსს-ს წარმომადგენელი სასამართლო განხილვების დროს განმარტავდა, რომ გამოკვლეული მტკიცებულებებით დასტურდებოდა, თუ როგორ იდგა ტყებუჩავა გზის სავალ ნაწილზე და გზას როგორ კეტავდა. უწყების იურისტი მსახიობის სამართადამრვევად ცნობას ითხოვდა.

ანი ტყებუჩავას განმარტებით კი, მას გზა არ გადაუკეტავს. ის რუსთაველის გამზირზე იმ დროს მივიდა, როცა გზა უკვე გადაკეტილი იყო. მისივე თქმით, ვიდეომასალა არსებობს, სადაც ჩანს, რომ გზა მისი აქციაზე მისვლამდე 15-20 წუთით ადრე გადაიკეტა.

მსახიობის თქმით, სამართალდამცავების მხრიდან არანაირი მოწოდება არ ყოფილა, წინააღმდეგ შემთხვევაში, ის მათ მოწოდებას დაემორჩილებოდა.

ტყებუჩავას ადვოკატი ადმინისტრაციული სამართალწარმოების შეწყვეტას ითხოვდა.

ადმინისტრაციულ სამართალდარღვევად ცნო სასამართლომ ასევე მსახიობი ბაჩო ქაჯაია. და მასაც ადმინისტრაციული სახდელის სახით 5000-ლარიანი ჯარიმა დაეკისრა.

შსს-ს წარმომადგენელმა გასულ სასამართლო პროცესზე განაცხადა, რომ ქაჯაიამ შეკრებისა და მანიფესტაციის შესახებ კანონი დაარღვია და გზა ხელოვნურად იმ დროს გადაკეტა, როცა ამისთვის ხალხის რაოდენობა საკმარისი არ იყო.

ადვოკატის, თორნიკე მიგინეიშვილის განცხადებით კი, მსახიობის მიმართ ადმინისტრაციული სამართალწარმოება უნდა შემწყდარიყო. ადვოკატის თქმითვე, ბაჩო ქაჯაია რუსთაველის გამზირზე ქუჩის ხელოვნურად გადასაკეტად არ მისულა, ის აქციაზე სისტემატურად მისი პროტესტის გამოსახატად დადის. ამასთან, მიგინეიშვილის თქმით, საქმეში ქაჯაიას წინააღმდეგ მტკიცებულება არ არის წარმოდგენილი, წარმოდგენილ ვიდეომასალაში კი ქაჯაია უკვე გადაკეტილ გზაზე დგას, შესაბამისად, იქ არ ჩანს, ქაჯაიამ რა გააკეთა ისეთი, რაც კანონდარღვევად ჩაითვლებოდა. ასევე, ადვოკატმა განაცხადა, რომ არც სამხრე კამერებია წარმოდგენილი, სადაც ჩანს, რომ ბაჩო ქაჯაია ვინმემ გააფრთხილა, რომ კანონდარღვევას სჩადიოდა.

ამასთან, სასამართლოში პოზიცია დააფიქსირა თავად მსახიობმაც და აღნიშნა, რომ ის აქციაზე მეგობრებთან ერთად როცა მივიდა, გზა უკვე გადაკეტილი იყო.

ბაჩო ქაჯაიას ადმინისტრაციულ სამართალდარღვევათა კოდექსის 174-ე პრიმა მუხლის მეოთხე ნაწილით გათვალისწინებული ქმედების ჩადენას ედავებოდნენ.