მიხეილ სააკაშვილი სასამართლო პროცესზე ვერ ჩართეს

პატიმრობაში მყოფი საქართველოს მესამე პრეზიდენტი, მიხეილ სააკაშვილი სასამართლო პროცესზე, რომელზეც მისი სასჯელის გადავადება/გათავისუფლების საკითხი განიხილება, ვერ ჩართეს. მიზეზი მოსამართლე გიორგი არევაძემ სხდომის დაწყების შემდეგ გააცნო სხდომათა დარბაზში მყოფ ადამიანებს.

“მოთხოვნაში დაფიქსირებული მქონდა, რომ უნდა წარმოედგინათ მსჯავრდებული, სხვა შემთხვევაში, თუკი ვერ წარმოადგენდნენ, მაშინ უნდა მომხდარიყო მისი დისტანციურად ჩართვა. ამასთან დაკავშირებით წერილობითი პასუხი ახლახან მივიღეთ და ეს გახლავთ, ბატონი ნიკა აბრამიშვილის [პენიტენციური სამსახურის თანამშრომლის] წერილია თავად, რომ: დღეის მდგომარეობით სპეციალური პენიტენციური სამსახური მოკლებულია შესაძლებლობას, რომ უზრუნველყოს მსჯავრდებულ სააკაშვილის დისტანციურად ჩართვა. და ასევე, წერილი ვივამედიდან, რომელიც ახლახან მომაწოდეს, “გაცნობებთ, 2022 წლის 14 დეკემბერს ჩანიშნულ სასამართლო პროცესზე, ექიმი არ მიიჩნევს მიზანშეწონილად, მიხეილ სააკაშვილის ტრანსპორტირებას”, – თქვა მოსამართლემ.

სააკაშვილის ადვოკატმა, შალვა ხაჭაპურიძემ იკითხა, რა არის მიზეზი, რატომ ვერ ხერხდება მსჯავრდებულის ჩართვა, როცა კლინიკაში არის ტექნიკის თანამედროვე აღჭურვილობა.

“გუშინ იუსტიციის მინისტრი გამობრძანდა და იმუქრება კადრების გავრცელებით. თუ ამდენი ტექნიკაა, ამდენი კადრებია, რა არის მიზეზი იმისა, რომ ვერ ხერხდება პატიმრის ჩართვა. ჩვენ უნდა ვიცოდეთ, “ადამიანის უფლებათა დაცვის ევროპული კონვენციის” მე-6 მუხლით, ყველა ადამიანს უფლება აქვს სამართლიანი სასამართლოს უფლება. რაშია საქმე?”

პენიტენციური სისტემის წარმომადგენელმა, ნიკა აბრამიშვილმა შალვა ხაჭაპურის კითხვაზე პასუხად თქვა, რომ “შესაბამის ტექნიკურ საშუალებებს სჭირდება შესაბამისი გამართვა. ამ ეტაპზე კლინიკა “ვივამედში” არ აქვს პენიტენციურ სამსახურს შესაბამისი ტექნიკური საშუალებები.”