რუსეთის საგარეო საქმეთა სამინისტრო ჟენევის საერთაშორისო დისკუსიების 57-ე რაუნდთან დაკავშირებით განცხადებას ავრცელებს და ამბობს, რომ მიუღებელია “კოლექტიური დასავლეთის” მცდელობები, უკრაინიდან კონფლიქტის ამიერკავკასიაში გადატანასთან დაკავშირებით.
განცხადებაში წერია, რომ თბილისს მოუწოდებენ “მეორე ფრონტი” გახსნას რუსეთის წინააღმდეგ ოკუპირებულ აფხაზეთსა და ცხინვალში.
“ცალ-ცალკე ხაზი გაუსვეს „კოლექტიური დასავლეთის“ მიმდინარე მცდელობების მიუღებლობას, გადაიტანოს უკრაინიდან ამიერკავკასიაში კონფრონტაციის ლოგიკა, რაც გამოიხატება პროვოკაციულ მოწოდებებში თბილისის მიმართ, გახსნას „მეორე ფრონტი“ რუსეთის წინააღმდეგ აფხაზეთსა და სამხრეთ ოსეთში.
ასეთი საშიში განცხადებები მოითხოვს სწრაფ რეაგირებას ჟენევის საერთაშორისო დისკუსიების თანათავმჯდომარეებისა და მათ მიერ წარმოდგენილ ორგანიზაციებისგან”, – ნათქვამია რუსეთის საგარეოს განცხადებაში.
განცხადებაში ასევე ნათქვამია, რომ “ადგილზე” არსებული ვითარების განხილვისას “კმაყოფილებით აღინიშნა სოხუმის, თბილისისა და ცხინვალის განწყობა, რომ განაგრძონ თავშეკავება”.
“შედეგად, საქართველო-აფხაზეთისა და საქართველო-სამხრეთ ოსეთის საზღვრისპირა რაიონში ვითარება შედარებით მშვიდი რჩება. სერიოზული ინციდენტები არ ფიქსირდება. ჟენევის პლატფორმის მუშაობაში პაუზის მიუხედავად, შესაძლებელი იყო დიალოგის შენარჩუნება მოლაპარაკებების სხვა ხაზებით, მათ შორის „ცხელი ხაზებით“ და ერგნეთში ინციდენტების პრევენციისა და მათზე რეაგირების მექანიზმის ფარგლებში”, – წერია განცხადებაში.
განცხადებაში წერია, რომ დღის წესრიგში დგას “საქართველო-აფხაზეთის საზღვარზე” მსგავსი მექანიზმის ფუნქციონირების აღდგენის საკითხი.
Loading ...
