მთავრობა რთველს წელსაც დაასუბსიდირებს

პრემიერმინისტრის, ირაკლი კობახიძის თქმით, მთავრობა რთველს წელსაც დაასუბსიდირებს. ამის დეტალებზე კობახიძემ მთავრობის სხდომაზე ისაუბრა.

“რაც შეეხება რთველს. 2024 წელს ყურძნის საპროგნოზო მოსავალი, დაახლოებით, 300 000 ტონას შეადგენს. ძალიან მნიშვნელოვანია, სახელმწიფომ ყველა ზომა მიიღოს იმისთვის, რომ ამ მოსავლის სათანადო რეალიზაცია მოხდეს. ამისთვის, რთველს წელსაც დავასუბსიდირებთ. 20 000-ზე მეტ მევენახეს მოსავლის გაყიდვის საშუალება მიეცემა. ასევე, რთველში ჩართულ 500-მდე კომპანიას ექნება იმის საშუალება, რომ ყურძნის შეუფერხებლად შესყიდვა და გადამუშავება განახორციელოს.

მთავრობის გადაწყვეტილებით, სახელმწიფო სუბსიდიას ის კომპანია მიიღებს, რომელიც ამ წლის რთველის განმავლობაში, კახეთის რეგიონში მოწეულ არანაკლებ 100 ტონა რქაწითლის ჯიშის ყურძენს შეიძენს და გადაამუშავებს და შესყიდული 1კგ ყურძნის სანაცვლოდ, მის ჩამბარებელს არანაკლებ 1 ლარს გადაუხდის. კახეთის რეგიონში მევენახის მიერ მოწეული ყურძნის შესყიდვის სანაცვლოდ, კომპანიებზე გასაცემი სუბსიდია 1კგ რქაწითელზე 20 თეთრს შეადგენს”. – თქვა კობახიძემ.

კობახიძის განცხადებით, იმისთვის, რომ მოსავლის ჩაბარება ორგანიზებულად მოხდეს, საკოორდინაციო შტაბი გაიხსნება.