ადამიანის სხეულში ღეროვანი უჯრედები სამშენებლო ჯგუფებს ჰგვანან, რომლებიც დაზიანების გამოსწორებაზე, საჭიროების შემთხვევაში ახალი კონსტრუქციების აშენებასა და მართვაზე არიან პასუხისმგებლები. ასაკის მატებასთან ერთად კი ამ ჯგუფების რაოდენობა მცირდება, ნელდება უჯრედების აღდგენის ტემპი და ადამიანი დაბერებას იწყებს.
ჩინეთის სამედიცინო უნივერსიტეტისა და მეცნიერების აკადემიის მკვლევრებმა სპეციალური ღეროვანი უჯრედი შექმნეს, რომელიც დაბერებასა და დაზიანებას უძლებს. მათ “დაბერებისადმი მდგრადი მეზენქიმური წინამორბედი უჯრედები” (SRCs) ეწოდება. საუბარია ძლიერ, გამძლე უჯრედებზე, რომლებსაც სტრესის დაძლევა შეუძლიათ და სიმსივნურ უჯრედებად არ გადაიქცევიან. სწორედ ამ უჯრედებს შეუძლიათ დაბერების ნიშნების დაძლევა.
ჟურნალ Cell-ში გამოქვეყნებული კვლევის თანახმად, მეცნიერებმა SRC უჯრედები მაიმუნებზე გამოცადეს. მეცნიერებმა დაკვირვება იმ მაიმუნებზე აწარმოვეს, რომელთა ასაკიც 60-70 წლამდე ადამიანის ეკვივალენტია. მაიმუნები SRC-ის ინტრავენურ ინიექციებს 44 კვირის განმავლობაში, ყოველ მეორე კვირას იღებდნენ. დოზამ კი სხეულის მასის თითოეულ კილოგრამზე 2 მილიონი უჯრედი შეადგინა. ამ პერიოდის განმავლობაში მეცნიერებმა ცხოველში მაღალი ტემპერატურა, იმუნური რეაქციები ან წონის კლება და სხვა გვერდითი მოვლენები ვერ გამოავლინეს. არ გამოვლინდა არც ქსოვილის დაზიანება ან სიმსივნური წარმონაქმნები – დადასტურდა, რომ SRC უსაფრთხოა.
რაც მთავარია, SRC უჯრედებმა შემოაბრუნეს დაბერების ძირითადი ნიშნები სხეულის 10 ძირითად სისტემასა და 61 ტიპის ქსოვილში. გაუმჯობესდა მაიმუნთა ტვინის აქტივობა, განმტკიცდა მათი ძვლები. კვლევებმა აჩვენეს, რომ მათი გენები გაცილებით ახალგაზრდა მაიმუნთა გენებს დაუახლოვდა.
წინასწარი შეფასებით, მაიმუნთა ტვინის უჯრედების ბიოლოგიური ასაკი 6-7 წლით შემცირდა.
ეს პირველი შემთხვევაა, როდესაც ღეროვანი უჯრედების თერაპია პრიმატების გაახალგაზრდავებისთვის წარმატებით გამოიყენეს, რაც ადამიანებზე ტესტირებაზე გადასვლისთვის ერთ-ერთი მთავარი წინაპირობაა.
bm.ge
Loading ...