მექსიკის პოლიციამ დასავლეთ ქალაქ გვადალაჯარას გარეუბანში ადამიანის სხეულის ნაწილებით სავსე 45 ჩანთა იპოვა. შესაბამისი უწყებები ქოლ-ცენტრის შვიდ ახალგაზრდა თანამშრომელს ეძებდნენ, რომლებიც გასულ კვირას დაკარგულებად გამოცხადდნენ.
ხალისკოს შტატის პროკურატურამ განაცხადა, რომ ჯერ უცნობია ეკუთვნით თუ არა სხეულის ნაწილები დაკარგულ ახალგაზრდებს. ჩანთებში ქალებისა და კაცების სხეულის ნაწილები ნახეს, ცხედრების რაოდენობა, ჯერ უცნობია.
მეხანძრეები და სამოქალაქო დაცვა მუშაობდნენ პოლიციასთან და ვერტმფრენის ეკიპაჟთან ერთად ნარჩენების ამოსაღებად.
პირველი ჩანთა სამშაბათს იპოვეს, მაგრამ რთული რელიეფის გამო, გამოძიება ოთხშაბათს განახლდა და გაგრძელდება მანამ, სანამ ყველა ნეშტი არ მოიძებნება, აცხადებენ პროკურატურაში.
ოფიციალურმა პირებმა განაცხადეს, რომ ისინი გააგრძელებენ მუშაობას, რათა დადგინდეს გარდაცვლილთა რაოდენობა, ვინ იყვნენ ისინი და რა იყო გარდაცვალების მიზეზები.
გაუჩინარების დანაშაულები შედარებით ხშირია მექსიკაში. მთავრობის მონაცემებით, 100 000-ზე მეტი ადამიანი უგზო-უკვლოდ დაკარგულად ითვლება, ბევრი მათგანი ორგანიზებული დანაშაულის მსხვერპლია. დამნაშავეები იშვიათად ისჯებიან.
მთავრობის მონაცემები აჩვენებს, რომ ბევრი გაუჩინარება მოხდა 2007 წლიდან, როდესაც მაშინდელმა პრეზიდენტმა ფელიპე კალდერონმა დაიწყო “ომი ნარკოტიკებთან”.
უგზო-უკვლოდ დაკარგულთა ახლობლები ამბობენ, რომ ხელისუფლება საკმარისს არ აკეთებს მათ აღმოსაჩენად და თანამდებობის პირები გულგრილები არიან, როცა მათ ახლობლებს უგზო-უკვლოდ დაკარგულად აცხადებენ.
Loading ...