კორონავირუსის პანდემიამ შესაძლოა აზიის სასიკეთოდ იმუშაოს და გლობალური ბალანსი შეცვალოს ეკონომიკური კუთხით, – განაცხადა გერმანიის კანცლერმა ანგელა მერკელმა. ამის შესახებ ინფორმაციას Reuters-ი ავრცელებს.
„პანდემია ჩვენ ეკონომიკურად უკან გვხევს, მაშინ როდესაც ბევრად უკეთესი მდგომარეობაა ჩინეთსა და სამხრეთ კორეაში კორონავირუსის გავრცელების თვალსაზრისით. ამ ქვეყნებს ჩვენზე უკეთესი ეპიდემიოლოგიური მდგომარეობა იმიტომ აქვთ, რომ პირბადეებს იყენებენ და ლოქდაუნებს არ აპროტესტებენ“, – განაცხადა მერკელმა.
როგორც გამოცემა წერს, გერმანიას ხშირად აქებდნენ კორონავირუსის პირველ ტალღასთან გამკლავების თვალსაზრისით, რადგან ქვეყანამ არ გამოაცხადა მასშტაბური ლოქდაუნები. თუმცა მეორე ტალღის შემთხვევაში ინფიცირების რიცხვი მაღალია.
გერმანიის ჯანდაცვის მინისტრის იენს შპანის თქმით, გერმანიის ხელისუფლება უკვე ამზადებს ვაქცინაციის ცენტრებს, რომლებიც მზად იქნება დეკემბრის შუა რიცხვებისთვის.
ამასთან, მინისტრმა აღნიშნა, რომ ზამთრის პერიოდი ყველაზე რთული იქნება.
„ჩვენ ყოველთვის ვამბობდით, რომ ზამთრის ცივი თვეები, როდესაც დროის უმეტესობას შენობებში ვატარებთ, ყველაზე რთული იქნება. ეს ასე იქნება ზამთრის ბოლომდე“, – განაცხადა მინისტრმა.
ცნობისთვის, გასულ თვეს მანვე აღნიშნა, რომ გერმანია „ბიონტექისა“ და „ფაიზერის“ მიერ შექმნილი ვაქცინის 100 მილიონ დოზას მიიღებს.
www.bm.ge
Loading ...