”მერაბ ჭანუყვაძე, გიორგი ღურჯუმელიძე, დარჩია და კლანი ჰქვია, რომელიც აფერხებს ოზურგეთის განვითარებას” – კონსტანტინე შარაშენიძე

ოზურგეთის მერობის დამოუკიდებელი კანდიდატი კონსტანტინე შარაშენიძე არჩილ და ავთანდილ თალაკვაძეებს პირდაპირ ეთერში დებატებს სთავაზობს. ეს შეთავაზება შარაშენიძემ დღევანდელ ბრიფინგზე გააჟღერა, როგორც დამოუკიდებელი კანდიდატი აცხადებს, ”ქართულმა ოცნებამ” მთელი წინასაარჩევნო კამპანია სიცრუით წარმართა და საზოგადოებამ სიმართლე ბოლო დღეებში მაინც უნდა გაიგოს.

”ორივე ძმას პირდაპირ ეთერში ვთავაზობ დებატებს, როგორც მოქმედი მერი და ოზურგეთის გულშემატკივარი, ასევე, როგორც კომპეტენტური ადამიანი თვითმმართველობის საკითხებში. ამას ვამბობ ამდენი ხანია.თუ მაგრები არიან და სიმართლის რაიმე ნატამალი და ნამუსი შერჩენილი აქვთ, რაც ძალიან დეფიციტია არჩილ თალაკვაძის ირგვლივ.  კი იცით რა ხალხი ჰყავს იმას ირგვლივ, ხალხი, რომელიც არის მხოლოდ და მხოლოდ ”კოტე არ იყოს” ამიტომ გაერთიანებული, თორემ ვის რად უნდა არჩილ თალაკვაძე, ათუკა და ჩიკო,  არავის არ სჭირდება, იმ ხალხს, ვისაც მერაბ ჭანუყვაძე, გიორგი ღურჯუმელიძე, დარჩია და კლანი ჰქვია, კლანი, რომელიც აფერხებს ოზურგეთის განვითარებას და ყოველთვის აფერხებდნენ. ეს ადამიანები მარტო საკუთარ თავზე ზრუნავენ, გამოცდილი მყავს ეს მე ეს ხალხი. ყველას მაგათ ვთავაზობ დებატებს, ვთავაზობ მთელ საკრებულოს, ყველას, ვისთანაც ოთხი წელი მომიწია ურთიერთობა. ეს სიცრუე, რომლითაც”ქართულმა ოცნებამ” საარჩევნო კამპანია ჩაატარა, მინდა ამ ბოლო დღეებში ხალხისთვის ცნობილი იყოს.  რომ ეს ხალხი არის მატყუარა ხალხი. შეგიძლიათ ყველას გადასცეთ რომ კოტე შარაშენიძე იწვევს ღია დებატებში ძმებ თალაკვაძეებს და მოვიდნენ, თუ მაგრები არიან” – განაცხადა კონსტანტინე შარაშენიძემ.

პარტია ”ქართულ ოცნებაში” შეთავაზებულ დებატებზე უარს ამბობენ და აცხადებენ, რომ ყველა ბრალდება სიცრუეა. ”თუ დარღვევის რაიმე ფაქტის შესახებ აქვს ინფორმაცია ვინმეს, შეუძლიათ მიმართონ შესაბამის ორგანოებს”- ამბობენ ”ქართულ ოცნებაში”