„რასაც დღეს ვუკვირდები, 2023 წლამდე ქსელურებთან ურთიერთობა სხვა იყო და მას მერე – სხვაა. დღეს პარტნიორობაზე ლაპარაკი ზედმეტია. „არ მოგწონს? წადი!“ – ზუსტად ეს მიდგომა აქვთ,” – ამის შესახებ რადიო „პალიტრასა“ და „პალიტრანიუსის“ გადაცემაში „საქმე“ კომპანია „სანდომის“ გენერალურმა დირექტორმა, მერაბ ვასაძემ განაცხადა.
მერაბ ვასაძე აღნიშნავს, რომ იმედით უყურებს ფასების კომისიას და თვლის, რომ ეს ყველაფერი შედეგს გამოიღებს.
„ძალიან დიდი მოლოდინი მაქვს, მგონია, რომ ბევრი რამ შეიცვლება. ქსელური მარკეტი ვერ უნდა გვესაუბროს იმ ტონით, რა ტონითაც გვესაუბრება. არ უნდა გვითხრას, რომ წავიდე მე და დარჩება სხვა, რომელიც აწყობთ. რაში აწყობთ ერთი მოთამაშე? – მოახრჩობს და ყოველ წუთს ამყოფებს იმის შიშში, რომ თუ არ დაუჯერებს, მასაც გააძევებს. აუცილებლად უნდა დაწესდეს ქეშბექის ზღვარი, სხვა შემთხვევაში მივალთ იქამდე, რომ ავალთ 90%-ზე და მთელს მოგებას წაიღებს ქსელური და რაც ყველაზე ცუდია, ასე ქართული წარმოება მოკვდება.
ქსელი, რომელიც ითხოვს ამ მაღალ პროცენტს, ისევ შენს წინააღმდეგ იყენებს მას. თვითონ ყიდის გაცილებით დაბალ ფასად, რაც შენ საფასო სეგმენტი გაქვს. გვაქვს მუდმივი ბაზარი, ყოველთვიურად, 1 კონტეინერი პროდუქცია გაგვაქვს პალესტინაში, მაგრამ ძირითადად ქართულ ბაზარს ვემსახურებით, ისევე, როგორც ის უნდა გვემსახურებოდეს ჩვენ,“ – განაცხადა მერაბ ვასაძემ.
შეგახსენებთ, რომ სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შესწავლის მიზნით, პარლამენტში შექმნილი დროებითი კომისიის ოთხი სამუშაო შეხვედრა უკვე გაიმართა. ფასებთან დაკავშირებით, პრემიერ-მინისტრმა პირველად 2025 წლის 24 დეკემბერს განაცხადა. საკითხის შესწავლაში სახელმწიფო უსაფრთხოების სამსახურიც ჩაერთო.
ამასთან, სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შესწავლის მიზნით, შეიქმნა სამთავრობო კომისია, რომლის ფარგლებშიც მოუსმინეს ადგილობრივ მწარმოებლებს, რითეილერებს, დისტრიბუტორებს, ასევე ფარმაცევტული სექტორის წარმომადგენლებს და ნავთობიმპორტიორებს.
რაც შეეხება შედეგებს, როგორც ცნობილია კომისია მუშაობას სავარაუდოდ, აპრილის ბოლომდე დაასრულებს.
www.bpn.ge
Loading ...