“მე არ ვარ ხმა, მე ვარ პიროვნება” – რას აცხადებს მუზეუმიდან გათავისუფლებული მაიკო გოგორიკიძე

ოზურგეთის სამუზეუმო გაერთიანებიდან ორი თანამშრომელი გაათავისუფლეს. რეორგანიზაციის შედეგად სამსახურიდან დათხოვნილია სამუზეუმო გაერთიანების დირექტორის მოადგილე მანანა მენაბდე და ექვთიმე თაყაიშვილის სახელობის მუზეუმის თანამშრომელი მაიკო გოგორიკიძე. გათავისუფლებულები მიიჩნევენ, რომ მათი დათხოვნა უსამართლოდ მოხდა. მაიკო გოგორიკიძე ამბობს, რომ გადაწყვეტილება პოლიტიკურია და ის სოციალურ ქსელში ხელისუფლების მიმართ კრიტიკული დამოკიდებულების, ასევე უკრაინისა და ევოკავშირის მხარაჭერის გამო დაისაჯა. “მე არ ვარ ხმა, მე ვარ პიროვნება” – ამბობს მაიკო გოგორიკიძე და თვლის, რომ სამსახურიდან მისი აქტიური საზოგადოებრივი პოზიციის გამო დაითხოვეს.

“ავთანდილ თალაკვაძე / Avtandil Talakvadze გილოცავთ,მუზეუმიდან გათავისუფლების შესახებ გავიგე უკვე… რის გამო მოაწყვეთ ივლისის შემდეგ ამხელა ამბავი, ყველას ხელი მოაწერინეთ მოსალოდნელ გათავისუფლებაზე, ორი ადამიანი რომ გაგეშვათ? ლანა ქავთარაძემ მიზეზად მუზეუმების “უკეთ მუშაობა” დაასახელა (ვიდეოს აქვე ავტვირთავ) ორი ადამიანი უშლიდა სამუზეუმო გაერთიანებას ხელს უკეთ მუშაობაში? პ.ს.სპექტაკლიც დაადგმევინეთ ექვთიმეზე, მაგრამ მაინც… არაფერი გიგრძვნიათ, ექვთიმესთან არც გაგივლიათ… პ.ს.ს. თავისუფალი აზრისთვის, ჩემი შეხედულებებისთვის “დავისაჯე…” ოზურგეთი პატარაა არავინ არაფერს ამბობს, მაგრამ ყველამ ყველაფერი იცის- ვინ მოყვანეთ მუზეუმში, ვის უშვებ, რატომ… გახსნის დღიდან ექვთიმეს მუზეუმში ვმუშაობ, ექვთიმეს მუზეუმი ჩემთვის სამსახურზე მეტი იყო. იტყვით არავინააა შეუცვლელიო, არც თქვენ ბატონო მერო!.. ოზურგეთის მუნიციპალიტეტის მერია • Ozurgeti City Hall ლანა ქავთარაძე” – წერს მაიკო გოგორიკიძე სოციალურ ქსელში.

მის გათავისუფლებას უსამართლოდ მიიჩნევს მუზეუმის გამგე რუსლან ურუშაძეც. მისი განცხადებით, სამსახურიდან მისი თანამშრომელი მისი გადაწყვეტილების და მასთან შეთანხმების გარეშე გაათავისუფლეს.

ოზურგეთის მუნიციპალიტეტის მერიაში ამბობენ, რომ გათავისუფლება პოლიტიკური ნიშნით არ მომხდარა.

“ოზურგეთის მერია პოლიტიკური ნიშნით არ ათავისუფლებს თანამშრომლებს.

ქალბატონი მაიკოს და ქალბატონი მანანას გათავისუფლება მოხდა კანონის სრული დაცვით და თუ მათ აქვთ პრეტენზია შეუძლიათ მიმართონ შესაბამის უწყებებს.” – აცხადებენ ოზურგეთის მერიაში.