გურიაში სტიქიის შედეგად დაღუპული მეორე არასრულწლოვნის ცხედარიც იპოვეს

მაშველებმა გურიაში განვითარებული სტიქიის შედეგად დაღუპული მესამე ადამიანის ცხედარიც იპოვეს. ლანჩხუთის მუნიციპალიტეტის სოფელ ჩოჩხათში ნაპოვნია არასრულწლოვნის ცხედარი. მაშველები დაკარგულს დღეს მთელი დღის მანძილზე ეძებდნენ.

ამის შესახებ ინფორმაციას შინაგან საქმეთა სამინისტყრო ავრცელებს.

“შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებმა, გურიის რეგიონში, სტიქიის ზონაში მესამე ცხედარი იპოვეს.

ამ ეტაპზე, სტიქიის ზონიდან უსაფრთხო ადგილზე გადაყვანილია 50-მდე მოქალაქე. ნაპოვნია სამი ცხედარი, მათ შორის ორი მოზარდის.

შინაგან საქმეთა სამინისტროს საგანგებო სიტუაციების მართვის სამსახურის უფროსი თემურ მღებრიშვილი სტიქიის ზონაში რჩება და საგანგებო შტაბს უწევს კოორდინაციას.

გურიის რეგიონში, შინაგან საქმეთა სამინისტროს შესაბამისი დანაყოფებიდან მობილიზებულია როგორც ცოცხალი ძალა, ასევე მძიმე ტექნიკა, მცურავი საშუალებები და კინოლოგთა ჯგუფი. სტიქიის ზონაში მონიტორინგი სპეციალური დრონებით მიმდინარეობს.”