„ეს უნდა ეთქვათ, სხვა რას იტყოდნენ?!“, – უთხრა რადიო თავისუფლებას პანკისის ხეობაში ჩატარებული სპეცოპერაციისას სასიკვდილოდ დაჭრილი თემირლან მაჩალიკაშვილის მამამ მალხაზ მაჩალიკაშვილი.
„პროკურატურა, რომელიც ორი წლის განმავლობაში საზოგადოებას ატყუებდა, სხვას რას იტყოდა? სხვა რა მოლოდინი უნდა მქონოდა? ან პროკურატურა ან სასამართლო სად არის?! ისინი სულ ცდილობდნენ რამენაირად თავიანთი ტყუილები გაეტანათ. მე ვცდილობ, რამენაირად სიმართლე დავადგინო“, – ამბობს მალხაზ მაჩალიკაშვილი.
მისი თქმით, ის გააგრძელებს სიმართლის დასადგენად ბრძოლას მიუხედავად, პროკურატურის მიერ გამოძიების შეწყვეტისა.
მთავარმა პროკურატურამ თემირლან მაჩლიკაშვილის მიმართ, ძალადობით სამსახურებრივი უფლებამოსილების შესაძლო გადამეტების ფაქტზე გამოძიება 2020 წლის 25 იანვარს შეწყდა. მიზეზად კი დასახელდა საქმეში სისხლის სამართლის კანონით გათვალისწინებული ქმედების არარსებობა.
გენერალური პროკურატურის განცხადებით, გამოძიების შედეგად დადასტურდა, რომ პანკისში ჩატარებული სპეცოპერაციისას, თემირლან მაჩალიკაშვილის მიმართ, არც სპეციალური დანიშნულების რაზმის წევრებს და არც რომელიმე მაღალი თანამდებობის პირს კანონსაწინააღმდეგო და ბრალეული ქმედება არ ჩაუდენია.
თემირლან მაჩალიკაშვილი 2017 წლის 26 დეკემბერს, პანკისის ხეობის სოფელ დუისში ჩატარებული სპეცოპერაციის შედეგად სასიკვდილოდ დაჭრეს. ის მიყენებული ჭრილობებისგან გარდაიცვალა.
თემირლან მაჩალიკაშვილის მშობლები ამ დრომდე მოითხოვენ, სახელმწიფომ ჩადენილი დანაშაული აღიაროს, რისთვისაც აქციებს მართავენ პარლამენტის შენობის წინ. ისინი მთელი საქართველოს მასშტაბით აგროვებდნენ ხელმოწერებს დროებითი საპარლამენტო საგამოძიებო კომისიის შექმნის მოთხოვნით.
სტრასბურგის სასამართლომ თემირლან მაჩალიკაშვილის საქმის არსებითი განხილვის გადაწყვეტილება მიიღო.
ევროპული სასამართლო განიხილვას საქმეს „მაჩალიკაშვილები და სხვები საქართველოს წინააღმდეგ“. სასამართლომ უკვე მიმართა საქართველოს მთავრობას და მოითხოვა თემირლან მაჩალიკაშვილის სიცოცხლის მოსპობის საქმეზე მიმდინარე გამოძიების მასალების, მათ შორის სპეცოპერაციის დაგეგმვასა და განხორციელებასთან დაკავშირებული დოკუმენტების წარდგენა.
მაჩალიკაშვილების ინტერესებს ევროსასამართლოში “ადამიანის უფლებათა სწავლებისა და მონოტორინგის ცენტრი” (EMC) წარმოადგენს. ორგანიზაციაში მიიჩნევენ, რომ თემილან მაჩალიკაშვილის სიცოცხლის ხელყოფის საქმის გამოძიება საქართველოში ფორმალურ სახეს ატარებს.
www.radiotavisupleba.ge
Loading ...
