რეგიონული განვითარებისა და ინფრასტურქუტრის მინისტრი მაია ცქიტიშვილი პირველ ვიცეპრემიერად, საგარეო საქმეთა მინისტრი დავით ზალკალიანი კი ვიცეპრემიერად დაინიშნა.
ამის შესახებ პრემიერმინისტრმა გიორგი გახარიამ მთავრობის სხდომაზე განაცხადა.
როგორც მან აღნიშნა, ქვეყნის წინაშე არსებული გამოწვევების დასაძლევად და დასახული მიზნების მისაღწევად, კოორდინირებული მუშაობაა საჭირო როგორც ეკონომიკური, ასევე საერთაშორისო ურთიერთობების მიმართულებით.
“ჩვენი ძირითადი მიზნის – ევროპული ინტეგრაციის მისაღწევად ქვეყნის ეკონომიკაში სტრუქტურული რეფორმების გაგრძელება კრიტიკულად მნიშვნელოვანია, ისევე როგორც მაკროეკონომიკური სტაბილურობის შენარჩუნება. ეს იქნება მნიშვნელოვანი, რომ გადავლახოთ გლობალური ეკონომიკური კრიზისი და ასევე, 2024 წლისთვის ქვეყანა ეკონომიკურად იყოს მზად ხმამაღალი, დამსახურებული განაცხადის გასაკეთებლად ევროკავშირში სრულფასოვანი წევრობისთვის. ამისთვის საჭიროა კოორდინირებული მუშაობა, ამიტომ დღეს მინდა წარმოგიდგინოთ პირველი ვიცეპრემიერი ეკონომიკური საკითხების მიმართულებით, ქალბატონი მაია ცქიტიშვილი.
გარდა ამისა, მეორე საკითხი, რომელიც იქნება პრიორიტეტული მთავრობისთვის, ეს არის ქვეყნის დეოკუპაცია და ქვეყნის ინტეგრაცია. ამ მიმართულებით, განსაკუთრებით დღეს, როდესაც რეგიონში მნიშვნელოვანი მოვლენები ვითარდება, საერთაშორისო ურთიერთობებს ენიჭება უფრო და უფრო დიდი მნიშვნელობა. ჩვენთვის მნიშვნელოვანია ოკუპაციაზე პასუხი და ქვეყნის შემდგომი ინტეგრაცია საერთაშორისო ორგანიზაციებში. ამიტომ, საქართველოს მთავრობის კიდევ ერთი ვიცეპრემიერი იქნება საგარეო საქმეთა მინისტრი დავით ზალკალიანი”, – განაცხადა გახარიამ.
Loading ...