Kaspi.kz-მა 2025 წლის დეკემბერში ალმათიში ოფიციალურად დაიწყო უნიკალური ბიომეტრიული გადახდის სერვისი – Kaspi Alaqan, რომელიც მომხმარებლებს საშუალებას აძლევს, გადაიხადონ მხოლოდ ხელისგულის სკანირებით, ბარათის, ტელეფონის ან ინტერნეტის გარეშე.
კომპანიის ფინანსური ანგარიშის მიხედვით, მხოლოდ 3 თვეში, 2026 წლის თებერვლის ბოლოსთვის, სერვისზე დარეგისტრირდა 500,000-ზე მეტი მომხმარებელი, რაც ალმათის ზრდასრული მოსახლეობის დაახლოებით მესამედს შეადგენს. იმ სავაჭრო ობიექტებში, სადაც ხელისგულით გადახდა ხელმისაწვდომია, ტრანზაქციების 9%-ზე მეტი უკვე ამ ტექნოლოგიით სრულდება.
ანგარიშში წერია, რომ Kaspi Alaqan-ის მთავარი უპირატესობაა გადახდის შესაძლებლობა მაშინაც კი, როდესაც მომხმარებელს არ აქვს თან ბარათი, ტელეფონი ან არ არის ინტერნეტკავშირი. ეს ტექნოლოგია ეფუძნება ხელისგულის უნიკალური ბიომეტრიული მონაცემების სკანირებას, რაც უზრუნველყოფს როგორც უსაფრთხოებას, ისე მოხერხებულობას.
Kaspi.kz გეგმავს 2026 წლის განმავლობაში სერვისის დანერგვას ყაზახეთის სხვა ქალაქებშიც. კომპანიის განცხადებით, ეს არის კიდევ ერთი მაგალითი იმისა, თუ როგორ ცდილობს კომპანია ინოვაციებით ლიდერობას და მომხმარებელთა გამოცდილების გაუმჯობესებას.
კომპანიის თანადამფუძნებლის და ხელმძღვანელის, ქართველი მილიარდერი მიხეილ ლომთაძის თქმით, Kaspi Alaqan-ის სწრაფი გავრცელება კომპანიის ბრენდის ნდობისა და ინოვაციური მიდგომის შედეგია.
„ჩვენი მიზანია, მომხმარებლებს შევთავაზოთ ყოველდღიურ ცხოვრებაში მაქსიმალურად მოსახერხებელი და უსაფრთხო სერვისები,“ – აღნიშნავს Kaspi.kz-ის ხელმძღვანელი.
ანგარიშის მიხედვით, Kaspi Alaqan-ის წარმატება აჩვენებს, რომ ყაზახეთის ბაზარი მზადაა ბიომეტრიული გადახდის ტექნოლოგიების სწრაფი ათვისებისთვის. კომპანიის პროგნოზით, სერვისის მასშტაბური დანერგვა კიდევ უფრო გაზრდის Kaspi.kz-ის ტრანზაქციების მოცულობას და გააძლიერებს მის პოზიციებს როგორც ინოვაციური ფინანსური ტექნოლოგიების ლიდერს რეგიონში.
შეგახსენებთ, მიხეილ ლომთაძე ყველა რეიტინგის მიხედვით ყველაზე მდიდარი ქართველია. მისი ქონების შეფასება forbes-ის მიხედვით 6 მლნ აშშ დოლარია, Bloomberg-ის შეფასებით, მისი ქონება 5.1 მლრდ აშშ დოლარს შეადგენს.
www.bm.ge
Loading ...