ლიდერთა მატჩი ფრედ დასრულდა — „მერცხალი“ ქუთაისიდან ქულით ბრუნდება

საქართველოს საფეხბურთო ჩემპიონატის მეოთხე ლიგაში დღეს, 6 მაისს  მეექვსე ტურის მატჩები გაიმართა.

ოზურგეთის “მერცხალი” სტუმრად გათამაშების ლიდერს, ქუთაისის “ტორპედო 2”-ს შეხვდა.

ლიდერთა მატჩი დაძაბულად და გარდამავალი უპირატესობით წარიმართა. გიორგი ჭანუყვაძემ უკვე მე-7 წუთზე წინ გაიყვანა ოზურგეთელები. მასპინძლებმა პირველივე ტაიმში (32-ე წუთი) შეძლეს ანგარიშის გათანაბრება. მეორე ტაიმში, 57-ე წუთზე უკვე “ტორპედო 2” გავიდა წინ, თუმცა ამჯერად “მერცხალმა” გაათანაქბრა ანგარიში. გოლი მასპინძელთა კარში, 72-ე წუთზე რომან მორჩილაძემ გაიტანა.

საბოლოოდ ლიდერთა მატჩი ფრედ, 2-2 დასრულდა.

სამწუხაროდ კვლავ დამარცხდა  ჩოხატაურის “ბახმარო”, რომელმაც საკუთარ მოედანზე “არაგველებთან” 0-4 დათმო შეხვედრა.

6 ტურის  შემდეგ “მერცხალს”  13 ქულა აქვს და მიუხედავად იმისა, რომ მხოლოდ ერთი ქულით ჩამორჩება ლიდერებს, გათამაშების ცხრილში ამ მომენტისთვის მე-5 ადგილზე იმყოფება. ცხრილის სათავეში მყოფ სამ გუნდს ერთნაირი 14-14 ქულა აქვთ, ხოლო “არაგველები” ბურთების უკეთესი სხვაობით უსწრებს “მერცხალს”

რაც შეეხება ბახმაროს, იგი 3 ქულით მე-15 ადგილზეა.

მორიგ შეხვედრას ოზურგეთელები 13 მაისს გამართავენ და საკუთარ მოედანზე  “სამგურალ 2”-ს უმასპინძლებენ.