ლესტერ სიტი – ამბავი დაუჯერებელ წარმატებაზე!

შეუძლებელი ყოველთვის დაუჯერებლად მოჩანს, სანამ არ მოხდება!

ნელსონ მანდელა

2016 წლის 2 მაისი დიდხანს, ძალიან დიდხანს ემახსოვრებათ. 2 მაისი იყო დღე, როცა ყველაზე დიდი შოკი ფეხბურთში და ზოგადად, სპორტის ისტორიაში, საბოლოოდ ოფიციალურად გაფორმდა: ლესტერ სიტი ინგლისის პრემიერლიგის ჩემპიონი გახდა! ფეხბურთის ბევრი ფანი თვალებს გაკვირვებით იფშვნეტდა, ასეთი რამის წარმოდგენა მსოფლიოს ყველაზე კონკურენტულ ჩემპიონატში დაუჯერებელი იყო. ამ გუნდს აქამდე არასდროს მოეგო პრემიერლიგა, მხოლოდ შორეულ 1929 წელს მიაღწიეს მათ კლუბის არსებობის ისტორიაში უმაღლეს შედეგს, მეორე ადგილს. სენსაციამდე 7 წლით ადრე ლესტერი ლიგა ერთში თამაშობდა, რომელიც რანგით მესამე ლიგაა ინგლისის ჩემპიონატისა. 2014/15 წლების სეზონისთვის ისინი პრემიერლიგაში აღზევდნენ და იმავე წელს გავარდებოდნენ, რომ არა ბოლო 7 მატჩში 9 გამარჯვება. არცერთი გუნდი ასე ხანგრძლივად არ ყოფილა ცხრილის ფსკერზე პრემიერლიგის ისტორიაში (140 დღე) და შემდეგ გავარდნას გადარჩენილა. სეზონის სტარტზე მათ ჩემპიონობას კუში 5000 ჰქონდა! იცით ეს რას ნიშნავს? უფრო მეტი შანსი იყო ელვის პრესლი ცოცხალი ეპოვათ, ამას 2000 კუში ჰქონდა, ანაც ლოხ ნესის მითიური ურჩხული ნამდვილად აღმოეჩინათ შოტლანდიაში, 500 კუში.

ლესტერის მენეჯერმა ნაიჯელ პირსონმა სეზონი გადაარჩინა, გუნდი პრემიერლიგაში დარჩა და მის ადგილზე იტალიელი კლაუდიო რანიერი დანიშნეს. მიზეზი გუნდის საშუალო დონის პერფორმანსი არ ყოფილა: მწვრთვნელი, მისი შვილი და კიდევ ორი ფეხბურთელი კლუბიდან რასისტული სკანდალის გამო დაითხოვეს და დანიშნეს კაცი, რომელიც საბერძნეთის ნაკრებიდან იმ დღეებში გაათავისუფლეს ფარერებთან საშინაო მარცხის გამო. ფარერები მაშინ მსოფლიო რეიტინგში 187-ე იყო. ცოტა სასაცილოც კია არა? ასეთი კომბინაციები იყო საჭირო ერთმანეთს დამთხვეოდა, რომ კლუბში მოხვდეს ადამიანი, რომელმაც კლუბის უდიდეს წარმატებას უნდა უხელმძღვანელოს. 64 წლის მწვრთვნელს არასდროს მოეგო ტიტული. მას მონაკოთი, იუვენტუსით, ჩელსით და რომათი მეორე ადგილი ჰქონდა მონაპოვები კარიერის განმავლობაში. ლესტერის ყველაზე ცნობილმა ფანმა, ლესტერისა და ბარსელონას ლეგენდამ და 1986 წლის მსოფლიო ჩემპიონატის ოქროს ბურთის მფლობელმა გარი ლინეკერმა გაოცებისგან დატვიტა: კლაუდიო რანიერი? მართლა?

რანიერიმ გუნდს პოზიტიური და კონტრშეტევებზე დაფუძნებული ფეხბურთი ათამაშა და დაამტკიცა, რომ საერთოდ არაა აუცილებელი ბურთის დიდი ხნით ფლობა თამაშის მოსაგებად. იგი იდეალურად უხსნიდა მოთამაშეებს წნეხს და მისი მსუბუქი დამოკიდებულება ფეხბუთელებს საშუალებას აძლევდა ფეხბურთის თამაშზე კონცენტრირებულიყვნენ. იტალიელი ბიჭებთან ერთად მხიარულობდა ხოლმე. გოლს თუ არ გაუშვებდნენ, ჯილდო პიცა იყო.რანიერის გუნდების გარდაქმნა მოსწონდა და მაგალითად, ჩელსის მენეჯერობისას გუნდში ბევრი ცვლილება მოახდინა, თუმცა, მოულოდნელად, ლესტერში მან მხოლოდ მცირე კოსმეტიკური სამუშაოები ჩაატარა და ამით დაკმაყოფილდა.

მე ძალიან ბედნიერი ვარ ჩემპიონობის მოპოვებით, რადგან, როცა გუნდს იბარებ, პირველობაზე ოცნებობ. მე მოვიგე ევროპის ყველაზე მნიშვნელოვანი ლიგა, არამხოლოდ ევროპის, მსოფლიოსიც!

კლაუდიო რანიერი.

ბევრი ასპექტი იყო საჭირო ერთმანეთთან კოლაბორაციაში შესულიყო, რომ ინგლისის პაწაწინა ქალაქის კლუბს დიდი შედეგისათვის მიეღწია. ყველაფერი იმით დაიწყო, რომ 2010 წელს ახალმა მფლობელმა, სამოგზაურო ბიზნესის მეფემ, ტაილანდელმა შრივადჰანაპრაბჰამ უოლკერ სთედიუმი კინგ ფაუერ სთედიუმად გადანათლა. მილიარდერს კარმის სჯეროდა, ანუ რასაც გასცემ, იგივე გიბრუნდება რაღაც სახით. კლუბმა 12 ათას გირვანქად 30 000 კარდონის ტაშსაკრავი შეიძინა და საშინაო თამაშებისთვის გულშემატკივრებს დაურიგა. ტაშსაკრავებს უზარმაზარი ხმაურის გამოწვევა შეეძლოთ სტადიონზე. მფლობელს ხშირად ჩამოჰყავდა ბუდისტი ბერები, რათა დაელოცათ სტადიონი და მათი კარმა გამარჯვებისთვის შეემზადებინათ. ცრუმორწმუნენი ლესტერის წარმატებას მეფე რიჩარდ მესამესაც უკავშირებენ, რომლის საფლავიც 2012 წელს ლესტერში მანქანების სადგომის ქვეშ აღმოაჩინეს და იგი ლესტერის კათედრალში გადაასვენეს 2014 წლის მარტის თვეში. მარტიდან მოყოლებული საჩემპიონო სეზონის ფინიშის ჩათვლით, ლესტერ სიტიმ პრემიერლიგაში 45 მატჩიდან მხოლოდ სამი წააგო. იქნებ მათ მადლიერი მეფის სულიც უჭერდა მხარს?!

ჩემპიონობის სავარაუდო პრეტენდენტებიც ისე იქცეოდნენ, სენსაციისათვის ნიადაგი ნამდვილად შემზადებული იყო. ვან გაალის მანჩესტერ იუნაიტედი ძველმოდურ ნელ ფეხბურთს თამაშობდა და თვითგანადგურების რეჟიმზე იყო გადასული, მანჩესტერ სიტიმ ტიტულის მომგები მანუელ პელეგრინი დაითხოვა და ერთი სეზონის შემდეგ გუარდიოლას მოსვლა დააანონსა, ხოლო ჩელსიში მესამე სეზონის სინდრომის დროება იდგა ჟოზე მოურინიოსათვის. ლივერპულიდან ბრენდან როჯერსი ახალი გაშვებული იყო და იურგენ კლოპი მხოლოდ მაშინ იწყებდა გუნდის ტრანსფორმაციას, არსენ ვენგერის არსენალი კი დიდი გაუგებრობა იყო. ამასობაში ლესტერი გამოჩნდა რადარზე, თამაშს თამაშზე იგებდა და უშიშრად მიემართებოდა გაურკვეველი მიზნებისაკენ. ყოველი ახალი გამარჯვების მოპოვების შემდეგ წარმოშობილ აღტკინებას მატჩისშემდეგ პრეს-კონფერენციაზე მეგობრულად მომღიმარი რანიერი წარმატებით ანეიტრალებდა და საჩემპიონო შანსების არარსებობაზე საუბრობდა. ტოპ კლუბები და კომენტატორები აგრძელებდნენ ფიქრს, რომ ლესტერის წარმატების სერია უბრალო გამოძახილი იყო წინა სეზონისა, როცა მიჯრით გამარჯვებების მოპოვებით ლესტერელები ძლივს გადაურჩნენ გავარდნას. ერთხელაც იქნებოდა და, ქალბატონი ფორტუნა მათ ზურგს აქცევდა!

ჰო მაგრამ, ნუთუ მხოლოდ ფორტუნაა საჭირო, რომ თავდამსხმელმა სარეკორდო 11 მატჩიანი გოლიანი სერია გამოაცხოს, როგორც ეს ჯეიმი ვარდიმ მოახერხა? 23 წლის ასაკში იგი ქარხნის მუშა იყო, მოყვარულთა ლიგაში თამაშობდა და მხოლოდ 2012 წელს გააფორმა პირველი პროფესიული კონტრაქტი ლესტერთან. სეზონის ბოლოს იგი ჟურნალისტებმა წლის ფეხბურთელად დაასახელეს.

და რიად მაჰრეზი? იგი საერთოდ ფიქრობდა, რომ ლესტერ სიტი სარაგბო კლუბი იყო, როცა მასთან დაკავშირება სცადეს. მაჰრეზი საფრანგეთის ქვედა ლიგაში თამაშობდა და ინგლისურმა ქვედალიგელმა ლესტერმა მასში მხოლოდ ნახევარი მილიონი გადაიხადა. ყველაზე ცნობილი მოთამაშე შმეიხელი იყო, ისიც იმიტომ, რომ მამამისი იყო მანჩესტერის ლეგენდა. ერთ-ერთი იმ მცირე ცვლილებათაგანი, რაც რანიერიმ მოახდინა და წინა სეზონისაგან განსხვავებდა კლუბს, ნგოლო კანტეს ყიდვა იყო, კაენმა ფრანგ მოთამაშეში მცირე თანხა, 5 მილიონი მიიღო. ისიც იღბალი იყო, როცა კლუბის სარეკრუტო განყოფილების თავკაცი, სტივ უოლში დენი დრინკუოტერს, რობერთ ჰუთს, დენი სიმპსონსა და მარკ ოლბრაიტონს ყიდულობდა, ფეხბუთელებს, რომლებსაც საკუთარ კლუბებში არ ათამაშებდნენ? სკაუტინგის დეპარტამენტის დიდი მიღწევა იყო ასევე შინჯი ოკაზაკის მაინციდან და მომავალი კაპიტნის, ვეს მორგანის მოყვანა ისტორიული მეტოქის, ნოტინგემ ფორესტის ბანაკიდან.

პრემიერლიგური ბობოლები ფიქრობდნენ, რომ ლესტერს ადვილად დაბომბავდნენ გოლებით, ავიწყდებოდათ რა მელიების სტილის სიძლიერე. ერთადერთი კონტრშეტევა სჭირდებოდა ხოლმე ლესტერს თამაშის მოსაგებად. ხშირად მეტ შედეგიან კონტრშეტევასაც გამოჰკრავდნენ ხოლმე თამაშის განმავლობაში. მათ ებადათ მაჰრეზის ტექნიკური შესაძლებლობები და ვარდის სინათლის სისწრაფე. ისინი მეტოქის მცველებს უსხლტებოდნენ და მატჩიდან მატჩამდე იზრდებოდნენ. სეზონის განმავლობაში ყველაზე დაბალი ადგილი მე-7 იყო ცხრილში, რაც გუნდს ეკავა, ეს იყო მეშვიდე ტურის შემდეგ, როცა მათ 5:2 წააგეს არსენალთან. ფანებმა მხარდაჭერას უმატეს, ხანდახან კლუბის პრეზიდენტი უფასო სასმელს და დონატებს არიგებდა სტადიონზე. ლესტერის უნივერსიტეტმა სეისმომეტრი განათავსა სტადიონთან და ნორვიჩ სიტის წინააღმდეგ გამარჯვების მომტანი გოლისას 89-ე წუთზე, რომელიც არგენტინელმა ლეონარდო ულოამ შეაგდო, 0.3 ბალი მიწისძვრა დაფიქსირდა რიხტერის შკალით!

კარდონის ტაშსაკრავები დიდ უპირატესობას გვანიჭებს თამაშის დღეს. ფანები იკრიბებიან და ხმაურით მხარდაჭერას გვიცხადებენ, ეს ნამდვილად მოქმედებს.

ლესტერის პრეს-სპიკერი.

ამ ფანებიდან ერთ-ერთმა, გოგონამ სახელად კარიშმა კაპურმა, 2 გირვანქა დადო 5000 კუშზე, ლესტერის ჩემპიონობაზე და კარგადაც იხეირა.

38 მატჩიდან მოპოვებული 81 ქულით ლესტერი ჩემპიონი გახდა.

• ლესტერის მთელი გუნდი იმდენივე ღირდა, რაც სიტის კევინ დე ბრუინი.
• გუნდმა წარმატება ჯეიმი ვარდის სახლში წვეულებით აღნიშნა.
• ერთი დღით ადრე თამაშამდე, რომელსაც საჩემპიონო 3 ქულა უნდა მოეტანა გუნდისთვის, კლაუდიო რანიერი იტალიაში გადაფრინდა, რათა 96 წლის დედა ლანჩზე დაეპატიჟებინა.
• იგი მხოლოდ მერვე მენეჯერი იყო, რომელმაც განახლებული პრემიერლიგა მოიგო.
• ლესტერი ფედერაციის თასის ფინალში გასვლებით რეკორდსმენია. 4 ფინალი, 4 მარცხი.
• ვეს მორგანმა ტრიუმფალურ სეზონში ყველა მატჩი შეუცვლელად ჩაატარა.
• ლესტერის ხრაშუნების ქარხანამ ერთი სახეობის ხრაშუნას “ჯეიმი ვარდი” დაარქვა.
• მაჰრეზმა ყველაზე მეტ გოლში მიიღო მონაწილეობა, ვიდრე რომელიმე სხვა პრემიერლიგელმა მოთამაშემ. იგი ფეხბურთელების ვერსიით წლის საუკეთესო მოთამაშედ დასახელდა.
• ამბობდნენ, რომ ლესტერზე ფილმს გადაიღებენ. კლაუდიო რანიერის სურვილია, მისი როლი რობერტ დე ნირომ შეასრულოს.

ეს ყველაფერი 2016 წელს მოხდა. მას შემდეგ ბევრმა წყალმა ჩაიარა. მაჰრეზი სიტიში იყო, კანტე ჩელსიში, რანიერი სხვა გუნდებს წვრთვნიდა, ლესტერის კარს  კასპერ შმეიხელი აღარ დარაჯობს, თუმცა გუნდის უპირობო ლიდერი ისევ ჯეიმი ვარდია. სამწუხაროდ, კლუბის ტაილანდელი მფლობელი საჰაერო კატასტროფაში დაიღუპა. მსოფლიოში პანდემია მძვინვარებდა და სტადიონები დაცარიელდა. ლესტერი პრემიერლიგიდან გავარდა…

…და წელს ისევ პრემიერლიგაში ითამაშებს, რადგან შარშან ჩემპიონშიპის ჩემპიონი გახდა! წარმატებები ლესტერ სიტის!

ავტორი: ლაშა ჩხაიძე