საქართველოს სახალხო დამცველმა ლევან იოსელიანმა „პირველ არხთან” ინტერვიუში ილაპარაკა თავის ახალდანიშნულ მოადგილეზე, ნათია ჯულაყიძეზე. როგორც ომბუდსმენმა თქვა, ის არა მისი, არამედ მისი ყოფილი პარტიის, „მოქალაქეების” ლიდერის, ალეკო ელისაშვილის ნათესავია.
„ისე როგორც მე, ნათიამაც დატოვა პარტია. ჩვენ, მე, აღარ ვარ პოლიტიკაში, შესაბამისად არც მე, არც მას არანაირი კავშირი აღარ აქვს პოლიტიკასთან. ეს დანიშვნა თვითონ არ ეწინააღმდეგება არანაირ კანონს, რაც მთავარია. ნეპოტიზმს რაც შეეხება, ის არ არის ჩემი ნათესავი, ის არის ალეკოს ნათესავი. მე მგონი, ალეკოსთან ნათესაობა არ არის რაღაც განაჩენი ადამიანისთვის, თუ ის არის პროფესიონალი და ის ნამდვილად არის პროფესიონალი. ის არის კომპეტენტური და მე მარტო ამ ნიშნით შევთავაზე ამ თანამდებობის დაკავება. მე დარწმუნებული ვარ, ის თავს ძალიან კარგად გაართმევს”, – თქვა ლევან იოსელიანმა.
ნათია ჯულაყიძის შესახებ „პალიტრანიუსის” ეთერში ილაპარაკა ალეკო ელისაშვილმაც.
„ნეპოტიზმი არის, როდესაც აბსოლუტურად გაუნათლებელ, შესაბამისი უნარების არმქონე და არანაირი კვალიფიკაციის მქონე ადამიანს, მხოლოდ შენი ახლობელი და ნათესავი რომ არის, წაიყვან და სადღაც თანამდებობაზე დასვამ, – აღნიშნა მან და დაამატა, – რაც შეეხება ჩემს დისშვილს, ჯერ ერთი, დამოუკიდებელი ადამიანია და თავისი საქმის ძალიან კარგი მცოდნე და პროფესიონალია. რა ვქნა, ჩემი დისშვილია, ასე გადაწყდა ბუნებაში”.
შეკითხვას – შენი დისშვილი რომ არ ყოფილიყო, მოხვდებოდა თანამდებობაზე? ელისაშვილმა უპასუხა: „სიმართლე გითხრა, იქ რომ წავიდა, მე ყველაზე მეტად დამწყდა გული, იმიტომ რომ ჩვენს პარტიაში თუ ვინმეს ევალებოდა და ებარა რამე, ეს იყო ნათია”.
ელისაშვილი ასევე განაცხადა: „ჩემი დისშვილი რატომ უნდა დაიჩაგროს იმის გამო, რომ ჩემი დისშვილია?!”
დეპუტატმა ისიც თქვა, რომ სახალხო დამცველის მოადგილედ მისი დისშვილის დანიშვნა, უხერხულობას არ უქმნის.
სახალხო დამცველის, ლევან იოსელიანის ერთ-ერთი ახალი მოადგილე გახდა ნათია ჯულაყიძე, ალეკო ელისაშვილის დისშვილი.
ალეკო ელისაშვილი და ლევან იოსელიანი ბავშვობის მეგობრები არიან.
„ალეკოსთან ნათესაური კავშირი დასამალი არ არის, ერთი დიდი ოჯახის წევრები ვართ, ბიძად მეკუთვნის, მაგრამ რაც შეეხება ჩემს პოზიციას, რაღაცნაირად სასაცილოდ მეჩვენება [ამაზე საუბარი]“, – განაცხადა ჯულაყიძემ რადიო თავისუფლებასთან საუბარში.
1996 წლის 30 მაისს დაბადებული ნათია ჯულაყიძე პარტია „მოქალაქეების“ დაფუძნებიდან იყო მისი წევრი.
2020 წლის საპარლამენტო არჩევნების წინასაარჩევნო პერიოდში მას 15 000 ლარი აქვს ფულადი სახით პარტიისათვის შეწირული.
ამ საკითხზე რადიო თავისუფლებასთან საუბარში თავდაპირველად მან თქვა: „ძალიან მინიმალური [მაქვს შეწირული], თუ არ ვცდები, რამდენიმე ათეული ლარი იყო… ზუსტად არ მახსოვს“.
დამაზუსტებელ კითხვაზე კი, – რომ საუბარია არა რამდენიმე ათეულ, არამედ 15 000 ლარზე, – განაცხადა:
„შეიძლება, შეიძლება, კი, კი, კი… პარტიის დაარსებიდან შეიძლება ვყოფილიყავი ერთ-ერთი [შემწირველი], იმიტომ რომ მეც დაინტერესებული და ჩართული ვიყავი ამ პოლიტიკური ჯგუფის აქტივობებში, თანამონაწილე ვიყავი“.
საქართველოს სახალხო დამცველმა ლევან იოსელიანმა საზოგადოებას 3 აპრილს წარუდგინა ორი ახალი მოადგილე:
- ნათია ჯულაყიძე (საჯარო ადმინისტრირების მაგისტრი) და
- ელენე ღუდუშაური (იურისტი, სამართლის მაგისტრი).
ღუდუშაურმა და ჯულაყიძემ ომბუდსმენის მოადგილეების პოსტებზე ეკატერინე სხილაძე და გიორგი ბურჯანაძე შეცვალეს, რომლებმაც თანამდებობები 30 მარტს დატოვეს.
აპარატში რჩება ლევან იოსელიანის მესამე მოადგილე თამარ გვარამაძე, რომელიც ახალი სახალხო დამცველის არჩევამდე ომბუდსმენის მოვალეობას ასრულებდა. იგი აგრძელებს სახალხო დამცველის პირველი მოადგილისა და აპარატის უფროსის პოსტზე მუშაობას.
წყარო: რადიო თავისუფლება
Loading ...