სახელმწიფო ლანჩხუთის რეგიონული ჯანდაცვის ცენტრის ფუნქციონირებას აჩერებს. აღნიშნულთან დაკავშირებით ნაციონალური მოძრაობის ადგილობრივმა ლიდერმა კახა ასკურავამ ბრიფინგი გამართა და ჯანდაცვის მინისტრს ეკატერინე ტიკარაძეს საქმის პირად კონტროლზე აყვანა მოსთხოვა. ასკურავას თქმით, პანდემიის პირობებში კლინიკის დახურვა დანაშაულის ტოლფასია. 70 წლიანი საავადმყოფოს ფუნქციონირების შეჩერებას აპროტესტებენ თანამშრომლებიც. თუ კლინიკა მუშაობას შეწყვეტს, სამსახურის გარეშე 80 მდე ადამიანი დარჩება. თითოეულ მათგანს აუღებელი აქვს ექვსი თვის ხელფასიც. როგორც თანამშრომლები ამბობენ, მათ ჯანდაცვის მინისტრის მოადგილე გიორგი წოწკოლაური შეხვდა და აღნიშნული გადაწყვეტილების შესახებ განუცხადა. თანამშრომლები ამბობენ, რომ წიწკოლაური აუღებელი ხელფასების და ორთვიანი კომპენსაციის დარიგებას დაპირდა. მათივე თქმით, გაჟღერდა ირიბი მუქარაც. თუ ხელფასების აღების სურვილი ექნებათ, მაშინ მინისტრის მოადგილემ მედიკოსებს მედიასთან ურთიერთობისგან თავის შეკავება ურჩია. საავადმყოფოს თანამშრომლების თქმით, კლინიკის დახურვის მიზეზად დასახელდა, რომ საავადმყოფო უნდა გარემონტდეს და შესაბამის სტანდარტებს დაექვემდებაროს, მაგრამ მაშინ როცა შენობა იპოთეკით არის დატვირთული ეს შეუძლებელია. ცნობილია, რომ კლინიკის შენობა ებრაულ კომპანია “ადითს” ეკუთვნის, რომელსაც სავარაუდოდ ქონება იპოთეკით აქვს დატვირთული, ხოლო თავად კლინიკა ამ დრომდე ჯანდაცვის ცენტრის დაქვემდებარებაში იყო.