ლავროვმა „უცხოური აგენტების შესახებ“ კანონს „ყველაზე რბილი“ უწოდა

რუსეთის საგარეო საქმეთა მინისტრი სერგეი ლავროვი სამი რადიოკომპანიისთვის „Спутник-ის”, “Говорит Москва-ს” და “Комсомольская правда-სთვის” მიცემულ ინტერვიუში ამბობს, რომ საქართველოში ინიციირებული „აგენტების კანონი“ „ურბილესია”

“საქართველოში ყველა ამ დემონსტრაციამ სალომე ზურაბიშვილი სიტყვის თავისუფლებისთვის მებრძოლად აქცია, თუმცა კანონი ურბილესია. ხოლო თავად აშშ-ში, საფრანგეთში, პოლონეთში, ბევრ სხვა ქვეყანაში არსებობს კანონები ჯარიმებით, სისხლისსამართლებრივი პასუხისმგებლობით, თუ შენ ფულს იღებ და მათზე არ ჰყვები და ამ ფულით რაღაც ისეთს აკეთებ”, – განაცხადა რუსეთის დიპლომატიის ხელმძღვანელმა.

ლავროვმა იგივე თქვა, რასაც პარტია „ქართული ოცნების“ ლიდერები ამბობენ, რომ კანონპროექტი, მხოლოდ თანხების დეკლარირებას მოითხოვს, თუ ორგანიზაცია დაფინანსების 20%-ზე მეტს უცხოეთიდან იღებს.

სერგეი ლავროვს ადრეც გაუკრიტიკებია საქართველოს პრეზიდენტი სალომე ზურაბიშვილი მისი პოზიციების გამო, ლავროვს ყოფილ კოლეგაზე ნათქვამი აქვს, რომ „მადლობა ღმერთს, ის [ზურაბიშვილი] არ განსაზღვრავს საქართველოს განვითარების გზებს“.