კრივის ფედერაცია ითხოვს, რომ კულტურის სამინისტროს სპორტი გამოეყოს

ამის შესახებ კრივის ფედერაციის წარმომადგენლებმა და საინიციატივო ჯგუფის სხვა წევრებმა პრესკონფერენცია გამართეს.

ფედერაციამ ეს მას შემდეგ მოითხოვა, რაც კულტურის მინისტრმა, თეა წულუკიანმა ძალადობის მცდელობისა და შეურაცხყოფის შესახებ ისაუბრა.

• 22 სექტემბერს მან აღნიშნა, რომ სპორტში ძალადობა სერიოზული პრობლემაა და ამაზე სამუშაოა — შემდეგ მან საზოგადოებრივი მაუწყებლის ეთერში განაცხადა, რომ კონკრეტული ფედერაციის პრეზიდენტმა გადაწყვიტა, მისთვის ხელი დაერტყა, მაგრამ არ დაუკონკრეტებია, ვინ;
• 28 სექტემბერს იმედის ეთერში კი თქვა, რომ ეს კრივის ფედერაციის ხელმძღვანელი იყო — 30 სექტემბერს წიკლაურმა განაცხადა, რომ წულუკიანს “უზრდელი” უწოდა, თუმცა ძალადობა “თავში არ გაუვლია”.

კრივის ფედერაციის პრეზიდენტის, დავით წიკლაურის განცხადებით, ამ თხოვნით ისინი პრემიერმინისტრს, ირაკლი ღარიბაშვილს მიმართავენ.

• “ვფიქრობთ, რომ სპორტს ვინც კურირებს, სულ მინიმუმ, სპორტი უნდა ესმოდეს და გათვითცნობიერებული უნდა ჰქონდეს”;
• საინიციატივო ჯგუფის წევრის, ირაკლი დოლაბერიძის თქმით კი, ქართულ სპორტში დღეს პრობლემებია, მათ შორის, ერთ-ერთი სამინისტროში არსებული “არაკომპეტენტურობაა”;
• “სპორტის სხვადასხვა უწყებასთან მიწებება იყო ძალიან დიდი შეცდომა”, — ამბობს ის.