დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, კორონავირუსის ნიშნების გამოვლენის შემთხვევაში, პირებს საქართველოს მასშტაბით ოთხი საავადმყოფო მოემსახურება. ეს საავადმყოფოებია თბილისის ცენტრალური საავადმყოფო, ბათუმის, ქუთაისისა და ზუგდიდის საავადმყოფოები. ამირან გამყრელიძის თქმით, ამ საავადმყოფოებს გააჩნიათ შესაბამისი მატერიალური ბაზა, ბოქსირებული განყოფილებები, სადაც მოხდება პაციენტების იზოლირება, დაკვირვება და მკურნალობა.
ამირან გამყრელიძე ამბობს, რომ საქართველოს საზღვრებზე მიმდინარეობს ყველა აუცილებელი ღონისძიება, რათა მაქსიმალურად შემცირდეს ქვეყანაში კორონავირუსის შემოსვლის რისკი:
„გუშინ და დღეს ჩინეთიდან საქართველოში შემოვიდა 110 და გავიდა ჩინეთის 129 მოქალაქე. საზღვრებზე მიმდინარეობს შესაბამისი ღონისძიებებია. 26 იანვრიდან საზღვრებზე დაიწყო ე.წ. თერმული სკრინინგი. ანუ, ჩინეთიდან შემოსულ ყველა მოქალაქეს დისტანციურად ეზომება ტემპერატურა და თუ ტემპერატურა 38 გრადუსზე მეტია, მაშინ ამ ადამიანს კონსულტაციას უწევს საზღვარზე ეპიდემიოლოგი და საგანგებო გადაუდებელი სამედიცინო დახმარების ექიმი, რომლებიც იღებენ გადაწყვეტილებას, საჭიროებს თუ არა პირი სამედიცინო დაწესებულებაში ევაკუაციას“.
30 იანვრის დილის მონაცემებით, მსოფლიოში კორონავირუსის ლაბორატორიულად დადასტურებული 7 711 შემთხვევა ფიქსირდება. ბოლო ერთი დღის განმავლობაში შემთხვევათა რაოდენობა გაიზარდა 1 737-ით. გარდაცვლილია 170 ადამიანი. 31 დეკემბრიდან დღემდე, დაავადების ექსპორტი მოხდა 11 ქვეყანაში.
დაავადებათა კონტროლის ეროვნული ცენტრის ინფორმაციით, საქართველოში კორონავირუსის არცერთი შემთხვევა არ არის დაფიქსირებული.
Loading ...
