კიევში რუსმა დივერსანტებმა ერთი ოჯახის სამი წევრი მოკლეს, მათ შორის ერთი ბავშვია

კიევში რუსმა დივერსანტებმა ავტომობილს, სადაც ერთი ოჯახის 5 წევრი იმყოფებოდა, ცეცხლი გაუხსნეს.

დაიღუპა 3 ადამიანი, ცოლ-ქმარი და მათი მე-4 კლასელი გოგო. ინფორმაციას  კიევის საქალაქო საბჭოს მდივანი ვოლოდიმირ ბონდარენკო ავრცელებს.

“მისი სახელი იყო პაულინი. სწავლობდა კიევის #24 სკოლის მე-4 კლასში. დღეს დილით მას და მის მშობლებს რუსმა სამხედრომ ესროლა”.- წერს ბონდარენკო FACEBOOK-ზე.

დაიღუპნენ მშობლებიც. ორი ბავშვი კი საავადმყოფოში გადაიყვანეს, მათი მდგომარეობა მძიმეა.

უკრაინის დედაქალაქ კიევის დასავლეთ რაიონში ძლიერი სროლისა და შეტაკების შედეგად 6 წლის ბიჭი დაიღუპა, დაიჭრა რამდენიმე მშვიდობიანი მოქალაქე. ინფორმაციას CNN-ი ადგილობრივ საავადმყოფოზე დაყრდნობით ავრცელებს.

სუმის ადმინისტრაციის ხელმძღვანელის დიმიტრი ჟივიცკის ინფორმაციით, ბოლო 24 საათში, ქალაქ ახტირკაში დაბომბვებს 6 ადამიანის სიცოცხლე ემსხვერპლა. ერთ-ერთი დაღუპული 7 წლის გოგონაა.