ოზურგეთის მუნიციპალიტეტის სოფელ ციხისფერდის საჯარო სკოლაში ონლაინ გაზეთი დაფუძნდა. ”მომავლის შვილები/ნორჩი ჟურნალისტები” – ასე ჰქვია ციფრულ გამოცემას, რომელიც მერვე და მეცხრე კლასის მოსწავლეებმა სოფი თავდიშვილმა და ნინი თოიძემ შექმნეს და მკითხველს საინტერესო ამბებს ჰპირდებიან. სასკოლო ამბები, ახალგაზრდული თემები, შემეცნებითი სტატიები, შემოქმედებითი რუბრიკები – იდეის ავტორები გაზეთის განვითარებას ამ მიმართულებით გეგმავენ. თავიანთ გეგმებსა და მიზნებზე გოგონებმა გურია TV- სთან ისაუბრეს.
ნინი თოიძე: 2022 წელს, ჩვენს სკოლაში მოსწავლეთა თვითმმართველობის არჩევნები ჩატარდა, რომელშიც გავიმარჯვე. ამის შემდეგ, გადავწყვიტე შემომეკრიბა ბავშვები, რომლებთან ერთადაც სკოლის გაზეთს დავაარსებდი. თავიდან, სტატიებს ალექსანდროვის ფურცელზე ვწერდით, ილუსტრაციებს ხელით ვუკეთებდით და სკოლის კედელზე ვაკრავდით, თუმცა, ამან აღარ დაგვაკმაყოფილა და გადავწყვიტეთ ხმა ფართო მასებისთვის მიგვეწვდინა.
ამიტომ დავიწყეთ გაზეთის გაციფრულება. ამ იდეას საზოგადოების მხრიდან. ძალიან დადებითი რეაქცია მოჰყვა. ეს ჩვენთვის დიდი მოტივაციაა, ვაკეთოთ უფრო მეტი. ვაპირებ სწავლა ჟურნალისტიკის მიმართულებით გავაგრძელო. სოფი კი პოლიგლოტობაზე ფიქრობს.
სოფი თავდიშვილი: პირველი ინტერვიუ ჩვენთვის უსაყვარლესი დირექტორისგან ნინო ნადირიძისგან ავიღეთ. ვაპირებთ სხვადასხვა აქტივობის განხორციელებას. მაგალითად, გვინდა ჩვენს ონლაინ გაზეთში ნიჭიერი ბავშვები სხვადასხვა რეგიონის სკოლებიდანაც ჩავრთოთ და მივცეთ საშუალება გამოაქვეყნონ თავიანთი სტატიებიც. ამჯერად, ჩვენი საინფორმაციო გუნდი შედგება 5 წევრისგან: მეგი ლაღიძე, ნათია ჩუბინიძე, სოფი თავდიშვილი, მარი მუჯირი და ნინი თოიძე. ფუნქცია-მოვალეობები ისე გადავანაწილეთ, რომ თითოეული ჩვენგანის ინტერესებზე მაქსიმალურად იყოს მორგებული. ვწერთ ისეთ თემებზე, რაც გვიყვარს და აქტუალურია საზოგადოებისთვისაც.
გოგონების თქმით, მათი მიზანი სხვა ბავშვებისთვის მოტივაციის მიცემაა,რათა დაკავდნენ მსგავსი შემეცნებითი და სასარგებლო საქმიანობით.არ გაფლანგონ თავიანთი დრო ფუჭად და სარგებლობა მოუტანონ ქვეყანას. ტელეკომპანია ”გურიაTV” წარმატებებს უსურვებს პატარა კოლეგებს.
ავტორი: დიკო მუჯირი
მასალა მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.
Loading ...
