ციხიდან გამოგზავნილ წერილში აქციების დროს დაკავებული ვასილ კაძელაშვილი ამბობს, რომ დაკავებამდე თავისუფლების სანაცვლოდ “TV იმედის ეთერში დაჯდომა და დაწერილი ტექსტის წაკითხვა” შესთავაზეს, რაზეც მისი სიტყვებით უარი თქვა.
“მოგესალმებით! მადლობა მოკითხვისთვის, მხარდაჭერისთვის და თანადგომისთვის.
ციხის კედლებიდან ყველაზე მეტად ჩანს თქვენი ერთგულება, გაფასებთ და მიყვარხართ.
დაკავებამდე, გაყალბებული და დამონტაჟებული ვიდეოს გავრცელების შემდეგ, თავისუფლების სანაცვლოდ შემომთავაზეს იმედის ეთერში დაჯდომა და დაწერილი ტექსტის წაკითხვა, თუმცა ვერ გამტეხეს და ციხეში წასასვლელად გავემზადე.
ახლა, როცა ვითომ პრეზიდენტის შეწყალების საკითხი დადგა, მინდა გითხრათ:
2025-საც ციხეში შევხვდით, 2026-საც ციხეში შევხვდებით, 2027-საც და იმდენ წელს, რამდენიც ჩვენს ქვეყანას დასჭირდება.
არავის წინაშე ბოდიში არ გვაქვს მოსახდელი და ვერაფერს ვაღიარებთ, რაც არ ჩაგვიდენია.
გილოცავთ დამდეგს. მომავალი წელი ყოფილიყოს ჩვენი ქვეყნის წარმატებისა და წინსვლის წელი”. – წერს კაძელაშვილი.
ცნობისთვის, სახალხო დამცველმა, ლევან იოსელიანმა ჟურნალისტებთან საუბრისას განაცხადა, რომ სინდისის პატიმრების – ზვიად ცეცხლაძის, ვეფხია კასრაძისა და ვასილ კაძელაშვილის საქმეებზე სასამართლოს მეგობრის სტატუსით მიმართავს და დარღვევებზე ისაუბრებს.
შეგახსენებთ, რომ 2 სექტემბერს აქციების დროს დაკავებულ ზვიად ცეცხლაძეს, ვეფხია კასრაძეს და ვასილ კაძელაშვილს 2 წლით და 6 თვით პატიმრობა მიესაჯათ.
Loading ...