კათოლიკურ ეკლესიაში ტრანსგენდერებს მონათვლა და ნათლიობა შეეძლებათ – ვატიკანის გადაწყვეტილება

ვატიკანის გადაწყვეტილებით, კათოლიკურ ეკლესიაში ტრანსგენდერებს მონათვლა და ნათლიობა შეეძლებათ, – ამის შესახებ ინფორმაციას „როიტერი“ ავრცელებს.

ბრაზილიის ეპისკოპოსმა ხოსე ნეგრიმ კითხვით წმინდა საყდარს ლგბტ თემის წარმომადგენლების ნათლობისა და ქორწინების წმინდა რიტუალებში მონაწილეობასთან დაკავშირებით ივლისში მიმართა.

ტრანსგენდერების ნათლობასთან დაკავშირებით ვატიკანის რწმენის დოქტრინის დეპარტამენტი დადებით პასუხს იძლევა, თუმცა გარკვეული პირობებით, რომ „არ იქნება საჯარო სკანდალის გამოწვევისა და მორწმუნეებში დეზორიენტაციის გამოწვევის რისკი“.

ვატიკანის პასუხში, ასევე, აღნიშნულია, რომ ტრანსგენდერ პირებს შეუძლიათ, გახდნენ ნათლიები ან ჯვრისწერის მოწმეები, ადგილობრივი სასულიერო პირის შეხედულებისამებრ. თუმცა, გადაწყვეტილების მიღებისას მღვდელს მოუწევს გამოიჩინოს „პასტორალური წინდახედულობა“. ჯვრისწერის მოწმედ ყოფნა შეუძლია ჰომოსექსუალური იდენტობის პირსაც.

ვატიკანის რწმენის დოქტრინის დიკასტერიამ ბუნდოვანი პასუხი გასცა კითხვას, შეძლებენ თუ არა ერთნაირსქესიანი წყვილები აყვანილი შვილის ან სუროგატი დედის მიერ გაჩენილი ბავშვის მონათვლას.