როგორ მოქმედებს კორონავირუსი გარემოზე? ერთი შეხედვით დადებითად. ქუჩები ავტმანქანებისგან დაცარიელებულია, ქარხნების უმეტესობა გაჩერებულია. თუმცა გლობალურ დათბობაზე კორონავირუსის გამო გატარებულ ღონისძიებებს არანაირი ცვლილება არ მოუხდენია.
ყველა კვლევის მიხედვით დედამიწაზე ჰაერი გაცილებით სუფთა გახდა. აღსანიშნავია, რომ ევროპაში ყველაზე სუფთა ჰაერი თბილისში დაფიქსირდა.
თუმცა ყველას კარგად გვესმის, რომ ასე დიდხანს ვერ გაგრძელდება.
კარანტინის დამთავრების შემდეგ ჰაერის დაბინძურება ძველ ნიშნულს დაუბრუნდება.
რა ელის ამ შემთხვევაში დედამიწას?
„ფორტუნა“ „მწვანეთა მოძრაობა – დედამიწის მეგობრების“ თანათავმჯდომარეს ნინო ჩხობაძეს ესაუბრა.
„კორონავირუსის შედეგად ჩინეთში გაჩერებული ქარხნების გამო ატმოსფერო ფაქტობრივად გაიწმინდა. ასეთივე სიტუაციაა ბევრ ქვეყანაში, სადაც კარანტინის სისტემაა შემოღებული და სადაც მეტ-ნაკლებად შეჩერებულია ადამიანის მუშაობა. ძალიან ბევრი ქვეყანა ელექტროენერგიას ნაკლებად მოიხმარს. გერმანიაში ელექტროენერგიის მოხმარება 30%-ით შემცირდა. მსგავსი სიტუაციაა ევროპის რამდენიმე წამყვან ქვეყანაში.
ჩვენთან ელექტროენერგიის მოხმარების ძალიან დიდი შემცირება არ აღინიშნება, რადგან ძირითადი მომხმარებლები მოქალაქეები იყვნენ, რომლებიც ახლა თვითიზოლაციაში იმყოფებიან.
ატმოსფერული ჰაერს რაც შეეხება, მანქანების შემცირებამ პირველ ეტაპზე ასახვა ჰპოვა ატმოსფერული ჰაერის სისუფთავეზე, მაგრამ ყველა ექსპერტი პროგნოზირებს, რომ როგორც კი კარანტინის მოხსნის შემდეგ ძალიან ბევრი საწარმო დაკარგულის ანაზღაურებას შეეცდება და უფრო მეტად დაბინძურდება ჰაერი. ანუ ეკონომიკის ძველ ნიშნულზე დაბრუნების ხარჯზე შესაძლოა, ჰაერი უფრო დაბინძურდეს. გარემოს დამცველები მსოფლიოში ამუშავებენ პლატფორმებს თუ როგორი უნდა იყოს „პოსტკოვი ეკონომიკა“.
გარემოს დამცველები ამტკიცებენ, რომ „პოსტკოვი ეკონომიკა“ უნდა იყოს განსხვავებული, ანუ უნდა იყოს აგებული სამართლიანობაზე, მდგრადი განვითარების პრინციპებზე დაყრდნობილი და არამც და არამც ისეთი ლიბერტანისტური, როგორიც აქამდე იყო. ვთვლით, რომ ამ ეკონომიკამ ჩვენ ჩიხში არ უნდა შეგვიყვანოს.
Loading ...
