იტალიაში ახალი შტამით – „ომიკრონით“ ინფიცირების პირველი შემთხვევა დაფიქსირდა

იტალიაში კორონავირუსის ახალი შტამით – „ომიკრონით“ ინფიცირების პირველი შემთხვევა დაფიქსირდა. ინფიცირებულია პირი, რომელიც მანამდე მოზამბიკში იმყოფებოდა. ინფორმაციას „ევრონიუსი“ იტალიის ჯანდაცვის უმაღლეს ინსტიტუტზე დაყრდნობით ავრცელებს.

„პაციენტისა და მისი ოჯახის წევრების ჯანმრთელობის მდგომარეობა დამაკმაყოფილებელია“, – ნათქვამია ინსტიტუტის განცხადებაში.

კორონავირუსის ახალი შტამის ორი შემთხვევა დაფიქსირდა დიდ ბრიტანეთშიც. ინფორმაციას „ბიბისი“ ავრცელებს.

დიდი ბრიტანეთის ჯანდაცვის მინისტრის, საჯიდ ჯავიდის განცხადებით, კორონავირუსის ახალი შტამი, „ომიკრონი“ ჩელმსფორდში და ნოტინგჰემში დაფიქსირდა.

მისი თქმით, ინფიცირებულებთან კონტაქტის მქონე პირები თვითიზოლაციაში იმყოფებიან.

კორონავირუსის ახალი შტამის გამო, ევროკავშირის წევრმა სახელმწიფოებმა პარასკევს დახურეს საზღვრები მოგზაურთათვის აფრიკის სამხრეთ რეგიონის შვიდი ქვეყნიდან. ესენია ბოტსვანა, ესვატინი, ლესოტო, მოზამბიკი, ნამიბია, სამხრეთ აფრიკა და ზიმბაბვე.