“ისტორიას მოვყვები, რატომ შეირჩა სალომე ზურაბიშვილის კანდიდატურა პრეზიდენტის პოსტზე”-კობახიძე

ქართული ოცნების თავმჯდომარემ ირაკლი კობახიძემ,  TV იმედის ეთერში ისაუბრა და  გაიხსენა, თუ რა კრიტერიუმების გამო შეარჩიეს სალომე ზურაბიშვილი პრეზიდენტის პოსტზე.

„ძირითადი კრიტერიუმი ერთი ის იყო, რომ ქალბატონი იყო და სიმბოლიზმზე კეთდებოდა აქცენტი, მათ შორის, ბატონი ბიძინას მხრიდან. ჩვენ გვაქვს ეს ისტორიული ტრადიცია თამარ მეფიდან მოყოლებული, ჩვენ ვამაყობთ იმით, რომ ქალები არიან წინა პლანზე, მათ შორის პოლიტიკურ ცხოვრებაში და ამ ტრადიციას ვეცით პატივი.

მეორე მნიშვნელოვანი ფაქტორი, რაზეც, ასევე, პირადად ბიძინა ივანიშვილი ამახვილებდა ყურადღებას, იყო მისი განსაკუთრებული კავშირი ჩვენს უახლეს ისტორიასთან: საუბარია პირადად მასზე, მის ოჯახზე – ის არის პირველი რესპუბლიკის დამფუძნებლების და მაშინდელი საზოგადო მოღვაწეების შთამომავალი და ესეც იყო ერთი მნიშვნელოვანი ფაქტორი.

მესამე მნიშვნელოვანი ფაქტორი იყო ის, რომ ეს ადამიანი არ იყო დაკავშირებული „ნაცმოძრაობასთან“ და მის პატრონებთან – ეს იყო მნიშვნელოვანი გარემოება და მესამე ფაქტორი, რის გამოც მიღებული იქნა მისი დასახელების გადაწყვეტილება,“ – აღნიშნა ირაკლი კობახიძემ.

მმართველი პარტიის თავმჯდომარემ განმარტა ისიც, რომ სალომე ზურაბიშვილის საპრეზიდენტო კამპანიის დროს „ნაციონალური მოძრაობის“ მიერ მის წინააღმდეგ წარმოებული აგრესიული კამპანიით, კიდევ ერთხელ გახდა ნათელი, რომ ზურაბიშვილის კავშირი არ ჰქონდა არც „ნაცმოძრაობასთან“ და არც ამ პარტიის უცხოელ მოკავშირეებთან.