სამხრეთ ისრაელის საპორტო ქალაქ აშდოდში მდებარე ასუთას საავადმყოფოს ცნობით, კლინიკაში 9 წლის ქართველი-ებრაელი გოგონა, თამარ ჰაია თორფიაშვილი დაიღუპა. ამის შესახებ ისრაელური გამოცემა, the Times Of Israel წერს.
გავრცელებული ინფორმაციით, გოგონამ გასულ კვირას ჰამასის სარაკეტო თავდასხმისას სირენების გააქტიურების შემდეგ გულის შეტევა მიიღო.
მომხდარის შესახებ დეტალების გასარკვევად ტაბულა საქართველოს საგარეო საქმეთა სამინისტროს დაუკავშირდა. უწყებაში გვითხრეს, რომ საკონსულო გარდაცვლილის ოჯახთან დაკავშირებას ცდილობს. ჯერჯერობით, უცნობია იყო თუ არა 9 წლის თამარი საქართველოს მოქალაქე.
ისრაელზე ჰამასის თავდასხმას ამ დრომდე კიდევ სამი ქართველი-ებრაელი ემსხვერპლა. ნოვას ფესტივალზე მოწყობილი ხოცვა-ჟლეტისას ტერორისტებმა მოკლეს ეთნიკურად ქართველი თამარ გოლდენბერგი. ამას გარდა, 7 ოქტომბრის თავდასხმას შეეწირა 2 ქართველი-ებრაელი ოფიცერი, აბრაამ ჰოვლაშვილი და იცხაკ ბაზუკაშვილი.
Loading ...