“ისინი ამ ქვეყნის მტრები არიან” – კალაძე ევროპარლამენტარების შესახებ

დედაქალაქის მერი, კახა კალაძე ქვეყნის მტრებს უწოდებს იმ დასავლელ პარტნიორებს, რომლებიც დეოლიგარქიზაციასა და დებიძინიზაციაზე საუბრობენ.

კალაძე ამტკიცებს, რომ ქართული ოცნება ევროკომისიის რეკომენდაციების შესასრულებლად ყველაფერს გააკეთებს.

“ისინი ამ ქვეყნის მტრები არიან, ვითომ მეგობრულად შერაცხულები. რაც შეეხება ქვეყნის კურსს, საქართველოს არასდროს გადაუხვევია ამ კურსისთვის, საქართველოს დღევანდელი ხელისუფლება არის ის ხელისუფლება, რომელმაც ყველაფერი გააკეთა ასოცირების ხელშეკრულების ხელმოწერაზე, უვიზო მიმოსვლასა და სხვა მნიშვნელოვან რეფორმებთან დაკავშირებით. ასევე იმ რეფორმებსაც განახორციელებს, რომელიც აუცილებელია ამ გზაზე.

რაც შეეხება იმ მოთხოვნებს, რომელიც იმისთვის მოგვაწოდეს, რომ ქვეყანამ სტატუსი მიიღოს, ჩვენ არაერთხელ გავაკეთეთ განცხადებები და კიდევ ერთხელ გავიმეორებ, რომ ყველაფერს გავაკეთებთ იმისთვის, რათა ეს ცვლილებები განხორციელდეს”, – თქვა კალაძემ.

სიტყვა “დებიძინიზაცია” პირველად ევროპარლამენტარმა რასა იუკნევიჩიენემ გამოიყენა. განმარტება კი მას შემდეგ გახდა საჭირო, რაც მმართველი პარტიის წარმომადგენლები უარყოფდნენ, რომ ევროკომისიის რეკომენდაციებში დეოლიგარქიზაციაზე ჩანაწერი ბიძინა ივანიშვილს შეეხებოდა.

დეოლიგარქიზაცია ერთ-ერთი მთავარი მოთხოვნაა იმ 12 პუნქტიდან, რომელიც საქართველომ ევროკავშირის კანდიდატის სტატუსის მისაღებად უნდა შეასრულოს.