ირანის ქალაქების, ბუშერის და დამავანდის ნავთობ-ქიმიური ქარხნების ათასზე მეტი მუშა შეუერთდა საპროტესტო გამოსვლებს, რომლებიც უკვე სამ კვირაზე მეტია გრძელდება და რისი საბაბიც თავსაფრის არასწორად ტარების გამო დაკავებული ქალის სიკვდილი გახდა.
ირანის ბევრ ქალაქში გამართულ გამოსვლებს მთავრობა სასტიკად უსწორდება. რადიო თავისუფლების ირანული სამსახურის, „რადიო ფარდას“ ცნობით, 10 ოქტომბერს მენავთობეებმა გადაკეტეს საწარმოსთან მისასვლელი გზები და დაცვის სამსახურის თანამშრომლებით გარშემორტყმულნი გაიძახოდნენ ლოზუნგს: „სიკვდილი დიქტატორს!“
ბოლო დღეებში მუშათა გაფიცვების შესახებ იტყობინებოდნენ ირანის, განსაკუთრებით ქურთული რეგიონების, რამდენიმე ქალაქიდან, სადაც ხალხმა აღშფოთება გამოხატა მას მერე, რაც გავრცელდა ცნობა, რომ 16 სექტემბერს გარდაიცვალა 22 წლის მაჰსა ამინი, რომელიც მორალის პოლიციამ ვითომ ჰიჯაბის არასწორი ტარების გამო დააპატიმრა. დამოუკიდებელი დასკვნა ამინის სიკვდილის შესახებ არ გაკეთებულა.
ოსლოში დაფუძნებული ჯგუფის, „ადამიანის უფლებები ირანში“, თანახმად, უშიშროების ძალების მიერ სულ მოკლულია 92 დემონსტრანტი, სხვა ორგანიზაციების ამტკიცებენ, რომ მოკლულთა რიცხვი მეტია და 160-ს უდრის. დაჭრილი და დაკავებულია ასეულობით პირი.
ირანის პოლიტიკურმა ხელმძღვანელობამ 9 ოქტომბერს გამართა სხდომა, რომელზეც ოფიციალურმა პირებმა ხალხს მოუწოდეს ერთობის შენარჩუნებისკენ, და რომ წინ აღუდგნენ ისლამური სისტემის მოწინააღმდეგეების „მტრულ ქმედებებს“.
Loading ...