ირანის ხელისუფლებამ მშვიდობის დარგში ნობელის პრემიის ლაურეატი ნარგეს მოჰამადი დააკავა. ინფორმაციას CNN ნარგეს მოჰამადის ფონდზე და მისი ძმაზე, მეჰდიზე დაყრდნობით ავრცელებს.
CNN-ის ინფორმაციით, პარიზში დაფუძნებულმა ნარგეს მოჰამადის ფონდმა განაცხადა, რომ მოჰამადი ხოსრო ალიკორდის, ადვოკატის, (რომელიც ცოტა ხნის წინ თავის ოფისში გარდაცვლილი იპოვეს) ხსოვნისადმი მიძღვნილი ცერემონიის დროს “ძალადობრივად დააკავეს”.
ირანის ერთ-ერთმა ყველაზე ცნობილმა ადამიანის უფლებათა დამცველმა, მოჰამადიმ, ნობელის მშვიდობის პრემია 2023 წელს მოიპოვა.
ნორვეგიის ნობელის კომიტეტმა მოჰამადის და სხვა აქტივისტების “სასტიკი დაპატიმრება” დაგმო და ხელისუფლებას მათი დაუყოვნებლივ გათავისუფლებისკენ მოუწოდა.
CNN-ის ცნობით, მოჰამადიმ ბოლო ორი ათწლეულის უმეტესი ნაწილი თეირანის ევინის ციხეში გაატარა, რომელიც რეჟიმის კრიტიკოსების დაკავებითაა ცნობილი.
2024 წლის დეკემბერში ირანის ხელისუფლებამ ის პატიმრობიდან სამი კვირით გაათავისუფლა, რათა ნოემბერში მარჯვენა ფეხის ქვედა ნაწილში ძვლის ნაწილის ამოკვეთის ოპერაციის შემდეგ გამოჯანმრთელებულიყო.
ნარგესის ფონდის ცნობით, მას რამდენიმე მუხლით ედავებოდნენ, როგორიცაა მაგალითად, ეროვნული უსაფრთხოების წინააღმდეგ ქმედება და პროპაგანდის გავრცელება — ჯამში მისი სასჯელი 36 წელს შეადგნს.
Loading ...