ირანის ყოფილი შაჰის ვაჟმა ირანელებს მიმართა – პრეზიდენტი ტრამპი ყურადღებით აკვირდება თქვენს მამაცობას, მზად არის, დაგეხმაროთ, არ დატოვოთ ქუჩები, ჩემი გული თქვენთანაა

ირანის უკანასკნელი შაჰის შვილის, რეზა ფეჰლევის განცხადებით, მომიტინგეებმა საპროტესტო აქციებით მნიშვნელოვნად დაასუსტეს ირანის რეჟიმი.

მან მომიტინგეებს კიდევ ერთხელ მიმართა და საპროტესტო აქციების გაგრძელებისკენ მოუწოდა.

„ქუჩებს ნუ მიატოვებთ. ჩემი გული თქვენთანაა“, – აღნიშნა რეზა ფეჰლევიმ.

მისი თქმით, მსოფლიო მხარს უჭერს ირანში მიმდინარე რევოლუციას და აშშ-ის პრეზიდენტმა, დონალდ ტრამპმა განაცხადა, რომ მზადაა ირანელ ხალხს დაეხმაროს.

„დღეს მსოფლიო თქვენს ეროვნულ რევოლუციას უჭერს მხარს და აღფრთოვანებულია თქვენი გამბედაობით. კერძოდ, პრეზიდენტი ტრამპი, როგორც თავისუფალი სამყაროს ლიდერი, ყურადღებით აკვირდება თქვენს აღუწერელ სიმამაცეს და განაცხადა, რომ მზადაა დაგეხმაროთ“, – განაცხადა რეზა ფეჰლევიმ.

დასავლური მედია წერს, რომ ირანში ინტერნეტის გათიშვა, სავარაუდოდ, მნიშვნელოვნად შეზღუდავს ფაჰლავის გზავნილზე წვდომას.