“ირაკლი ღარიბაშვილის ახალი ძალა” _ ამ სახელწოდებით ფეისბუქში გვერდი რამდენიმე დღის წინ შეიქმნა. სოციალურ ქსელში განთავსებული ინფორმაციით ირკვევა, რომ ამ ძალას ვებგვერდიც აქვს. “თუ მზად ხარ ქვეყნის შესაცვლელად, შეავსე ფორმა. ახალი ძალა არის ღია პლატფორმა, რომელიც აგროვებს წევრებს. ჩვენ ვეცდებით შევქმნათ მანიფესტი რის გარშემოც გავერთიანდებით და შევცვლით ქვეყანას” _ წერია ვებგვერდზე, სადაც ონლაინ რეგისტრაციის ფორმაა განთავსებული.სოციალური ქსელით ამ გვერდმა, რომელსაც მისამართად ქართული ოცნების ცენტრალური ოფისი აქვს მითითებული, ღონისძიებაც დაანონსა.
“გურია tv” შეეცადა გაიგო რა პოლიტიკურ ძალაზეა საუბარი და რა შუაშია ამ ყველაფერთან ირაკლი ღარიბაშვილი და შესაბამისი კითხვით თავდაცვის მინისტრს მივმართეთ
პირადად ირაკლი ღარიბაშვილმა ჩვენს კითხვებზე პასუხი არ გასცა, თუმცა, მალევე თავდაცვის სამინისტრომ განცხადება გაავრცელა, რომელშიც აღნიშნულია, რომ ამ მოძრაობასთან ღარიბაშვილს კავშირი არ აქვს.
“სოციალურ ქსელებში, პერიოდულად, საქართველოს თავდაცვის მინისტრის, ირაკლი ღარიბაშვილის სახელთან დაკავშირებული არაერთი ყალბი გვერდი იქმნება, რომლებიც საზოგადოების შეცდომაში შეყვანას და დეზინფორმირებას ისახავს მიზნად. მოცემული გვერდებით ვრცელდება მცდარი ინფორმაცია და გარკვეული პოლიტიკური დღის წესრიგის მიხედვით მიმდინარეობს საზოგადოებრივი აზრით მანიპულირება. მოგახსენებთ, რომ საქართველოს თავდაცვის სამინისტრო და საქართველოს თავდაცვის მინისტრი, ირაკლი ღარიბაშვილი სარგებლობენ მხოლოდ ოფიციალური “ფეისბუქ” და “ტვიტერის” გვერდებით. საზოგადოებას მოვუწოდებთ სიფრთხილე გამოიჩინონ აღნიშული ტიპის გვერდებზე განთავსებული ინფორმაციის მიმართ, _ აღნიშნულია განცხადებაში.
კომენტარები
Loading ...
